Американинг "Инертиа Энтерприсес" компанияси Ливермор миллий лабораторияси (LLNL) билан термоядровий технологияларни илмий тажрибалардан амалий фойдаланишга ўтказишни тезлаштириш мақсадида ҳамкорликни эълон қилди. Томонлар тижорат термоядровий электр станцияларини яратишга тўсқинлик қилаётган асосий муҳандислик муаммоларини биргаликда ҳал қилишни режалаштирмоқда. Бу ҳақда Ixbt.com хабар беради.
Лойиҳа доирасида янги оптик материаллар, лазер компонентлари ва кучли лазер қурилмалари учун прототиплар ишлаб чиқилади. Алоҳида эътибор инерциал синтез тажрибаларида энергия олиш учун асосий рол ўйнайдиган махсус ёнилғи капсулаларига — термоядровий нишонларга қаратилади.
Инерциал термоядровий синтез усули водородли кичик капсулани кучли лазерлар ёрдамида сиқиш орқали энергия олишни кўзда тутади. Жараён давомида юзага келадиган экстремал ҳарорат ва босим натижасида атом ядролари бирлашиб, юлдузлардаги каби улкан энергия ажралиб чиқади.
Ҳамкорлик доирасида "Инертиа" компанияси лабораториянинг инерциал синтез технологиялари билан боғлиқ 200 га яқин патентидан фойдаланиш имкониятига эга бўлди. Бу илмий натижаларни саноат ечимларига айлантириш ва келажакда ишлаб чиқариш базасини яратиш жараёнини сезиларли даражада тезлаштириши кутилмоқда.
“Zamin”ни Telegram'да ўқинг!
