"Samsung" компанияси қўллаб-қувватлаш муддати уч йил аввал якунланган "Galaxy S10" туркумидаги смартфонлар учун кутилмаган дастурий янгиланишни эълон қилди. G97x0ZHU8HZB1 рақамли янги прошивка ҳозирча Хитой ва Гонконг бозорларидаги "Galaxy S10e", "Galaxy S10" ҳамда "Galaxy S10+" моделлари учун тақдим этилди. Бу ҳақда Ixbt.com хабар беради.
Янги пакетнинг ҳажми 163 МБни ташкил этади ва у ўз ичига янги хавфсизлик патчларини олмаган. Қурилмалар ҳамон 2023 йил февраль ойидаги хавфсизлик тизимида қолмоқда.
Расмий маълумотларга кўра, ушбу янгиланиш фақатгина тизим барқарорлигини ошириш ва қурилманинг ишончли ишлашини таъминлашга қаратилган.
Дастурий таъминотни ўрнатган фойдаланувчиларнинг таъкидлашича, смартфонлар ишлашида сезиларли ижобий ўзгаришлар кузатилган. Хусусан, меню ва иловаларни очиш жараёни анча силлиқ ва тезкор кўринишга келган.
Бу ушбу туркум учун сўнгги икки йил ичидаги иккинчи режасиз янгиланиш бўлди.
Эслатиб ўтамиз, "Galaxy S10" серияси 2019 йилда "Android 9" операцион тизими билан сотувга чиққан эди. Кейинчалик ушбу қурилмалар 2022 йилда "Android 12" ва "Оне UI 4.1" интерфейсигача янгиланган.
Ҳозирча ушбу прошивканинг бошқа минтақаларда тарқатилиши бўйича расмий маълумот мавжуд эмас.
“Zamin”ни Telegram'да ўқинг!
