Microsoft бош директори Сатя Наделла OpenAI билан янгиланган ҳамкорлик компания молиявий ҳолатига қандай таъсир қилишини тушунтирди. Унинг сўзларига кўра, янги шартнома барча учун манфаатли ҳисобланади. Бу ҳақда Techcrunch.com хабар беради.
Наделла Microsoft энди OpenAI интеллектуал мулкидан, жумладан, унинг моделлари ва маҳсулотларидан бепул фойдаланиш ҳуқуқини сақлаб қолганини таъкидлади. Компания 2032 йилгача энг илғор сунъий интеллект технологияларидан тўлиқ фойдаланишни режалаштирмоқда.
Янги келишувга асосан, Microsoft энди OpenAI технологияларига мутлақ эгалик қилмайди. OpenAI ўзининг сунъий интеллект маҳсулотларини Amazon булутли хизматлари билан ҳамкорликда тақдим этишини эълон қилди.
Бунга қарамай, Наделла хавотирга ўрин йўқлигини билдирди. Microsoft компаниясининг сунъий интеллект бизнеси йиллик даромади 37 миллиард доллардан ошди ва ўтган йилга нисбатан 123 фоизга ўсди.
Шунингдек, OpenAI Microsoft булутли хизматларини сотиб олиш учун 250 миллиард доллардан ортиқ маблағ сарфлаш мажбуриятини олган. Microsoft эса OpenAI компаниясининг 27 фоиз улушига эгалик қилади.
Наделла корхоналар кўпинча бир нечта сунъий интеллект моделларидан фойдаланишни хоҳлашини қўшимча қилди. Ҳозирда 10 мингдан ортиқ мижозлар OpenAI, Anthropic ва бошқа очиқ манбали моделларни биргаликда ишлатмоқда.
“Zamin”ни Telegram'да ўқинг!
