Россия ҳукумати фуқароларга бошқа ҳудудга кўчиб ўтганда ўз мобил телефон рақамини сақлаб қолиш ҳуқуқини берувчи қарорни тасдиқлади. Ушбу янгилик 1-сентябрдан кучга киради ва абонентларга яшаш жойини ўзгартирганда рақамни йўқотмаслик имконини беради. Бу ҳақда Ixbt.com хабар беради.
Рақамни сақлаб қолиш учун алоқа операторига тегишли ариза билан мурожаат қилиш кифоя. Аризани шахсан ёки масофавий тарзда — операторнинг расмий сайти, кўчирилган рақамлар базаси оператори портали ёки Россиянинг «Госуслуги» давлат хизматлари портали орқали юбориш мумкин.
Ҳозирги вақтда бошқа шаҳарга кўчганда рақам сақланиб қолса-да, абонент эски тариф режасидан фойдаланишда давом этади. Бу эса янги ҳудуддаги абонентларга қўнғироқ қилиш харажатларини сезиларли даражада ошириб юбориши мумкин эди.
Янги қоидага кўра, эндиликда операторни ўзгартирганда ҳам рақамни сақлаб қолиш имконияти тақдим этилади. Ушбу ўзгариш 2035-йилгача алоқа тармоғини ривожлантириш стратегияси доирасида амалга оширилмоқда.
Ҳукумат вакилларининг таъкидлашича, ушбу қадам алоқа хизматларини янада қулай ва мослашувчан қилишга хизмат қилади. Шунингдек, бу соҳадаги рақобатни кучайтириш ва абонентлар учун қулай муҳит яратишга ёрдам беради.
“Zamin”ни Telegram'да ўқинг!
