Microsoft компаниясининг Кенияда барпо этилиши режалаштирилган йирик маълумотлар маркази лойиҳаси молиявий кафолатлар бўйича келишмовчиликлар сабабли тўхтаб қолди. Bloomberg агентлиги хабарига кўра, Microsoft ва унинг ҳамкори Г42 компанияси Кения ҳукумати билан ҳисоб-китоблар бўйича муросага кела олмаган. Бу ҳақда Ixbt.com хабар беради.
Томонлар ўртасидаги асосий зиддият давлат томонидан харид қилиниши керак бўлган ҳисоблаш қувватлари учун кафолатланган йиллик тўловлар схемаси атрофида юзага келди. Кения ҳукумати Microsoft таклиф қилган молиявий шартларни қабул қилишдан бош тортди.
Эслатиб ўтамиз, 2024-йилнинг май ойида томонлар Шарқий Африкада булутли инфратузилмани кенгайтириш мақсадида 1 миллиард долларлик сармоя киритиш бўйича келишувга эришган эди. Лойиҳа геотермал энергия асосида ишлайдиган ва Azure булутли платформасига уланган замонавий марказни қуришни кўзда тутган эди.
Ҳозирги вақтда музокаралар бутунлай тўхтатилмаган бўлса-да, лойиҳанинг кўлами қайта кўриб чиқилиши мумкин. Кения расмийлари мулоқот давом этаётганини ва энергия истеъмоли ҳамда марказ конфигурацияси каби муҳим параметрлар ҳали ҳам келишув босқичида эканлигини таъкидламоқда.
“Zamin”ни Telegram'да ўқинг!
