Германия, Хитой, Италия ва Канада олимлари ПЦР Ж1905+0154А тизими устида йигирма йил давом этган тадқиқотни якунладилар. Аресибо расадхонаси ва FAST радиотелескопи маълумотларини бирлаштирган мутахассислар миллисекундли пульсар — ўз ўқи атрофида атиги 3,19 миллисекундда бир марта айланадиган нейтрон юлдузининг ҳаракат моделини яратдилар. Бу ҳақда Ixbt.com хабар беради.
Макс Планк номидаги Радиоастрономия институти ва Хитой Фанлар академияси олимлари бошчилигидаги гуруҳ ушбу пульсар НГК 6749 юлдузлар тўдасига нисбатан сониясига 123 километр тезликда ҳаракатланаётганини аниқлади. Бу кўрсаткич мазкур тўда учун белгиланган иккинчи космик тезликдан 10 баробар юқори бўлиб, объектнинг тўдадан ташқарига отилиб чиқаётганини ёки у ерга тасодифан кириб қолганини англатади.
Тадқиқотнинг муҳим босқичи пульсарнинг ҳамроҳи — гелийли оқ митти юлдузни аниқлаш бўлди. Ҳуббле космик телескопи ёрдамида топилган ушбу юлдуз массаси Қуёш массасининг 17–19 фоизини ташкил этади. Унинг совиш жараёнини таҳлил қилиш орқали олимлар тизимнинг 400–700 миллион йил аввалги фаол даврини ўрганишга муваффақ бўлдилар.
НГК 6749 тўдасининг сийраклиги астрофизикларга пульсарнинг магнит майдони ва ҳақиқий ёшини (тахминан 3 миллиард йил) аниқ ўлчаш имконини берди. Бу кашфиёт юлдузлар эволюцияси қонуниятларини текшириш ва паст зичликдаги шароитларда экзотик жуфтликлар қандай шаклланишини тушуниш учун ноёб имконият яратади.
“Zamin”ни Telegram'да ўқинг!
