Threads ижтимоий тармоғи Х платформасидаги Grok тизимига ўхшаш янги Meta AI интеграциясини синовдан ўтказишни бошлади. Эндиликда очиқ аккаунтга эга фойдаланувчилар пост ёки изоҳларда Meta AI'ни белгилаб, маълум бир мавзу бўйича қўшимча маълумот олишлари мумкин. Бу ҳақда Techcrunch.com хабар беради.
Ҳозирги вақтда ушбу функция Малайзия, Саудия Арабистони, Мексика, Аргентина ва Сингапурда бета-тест режимида ишламоқда. Meta компаниясининг таъкидлашича, янгилик фойдаланувчиларга тренддаги воқеалар ва янгиликлар бўйича реал вақт режимида маълумот олиш ҳамда тавсиялар сўраш имконини беради.
Фойдаланувчилар @meta.ai аккаунтини белгилаб, турли саволлар беришлари мумкин ва сунъий интеллект пост ёзилган тилда жавоб қайтаради. Бу орқали Threads шунчаки мулоқот майдони эмас, балки ахборот олиш ва тавсиялар марказига айланишни мақсад қилган.
Grok тизимидаги каби бу функциянинг ҳам хавфсизлик масалалари муҳим аҳамият касб этади. Meta компанияси сунъий интеллект жавобларини чеклаш ёки уларни яшириш имкониятини ҳам тақдим этган. Компания дастлабки фикр-мулоҳазаларни ўрганиб, функцияни янада такомиллаштиришни режалаштирмоқда.
“Zamin”ни Telegram'да ўқинг!
