Электроника ишлаб чиқариш бўйича дунёдаги энг йирик компаниялардан бири бўлган Фохконн киберҳужумга учраганини тасдиқлади. Мазкур корхона Apple, Google, NVIDIA ва Sony каби технология гигантлари учун бутловчи қисмлар ва қурилмалар етказиб беради. Компания вакилларининг маълум қилишича, ҳужум Шимолий Америкадаги заводларга таъсир кўрсатган, бироқ ҳозирда ишлаб чиқариш жараёнлари босқичма-босқич тикланмоқда. Бу ҳақда Techcrunch.com хабар беради.
Ҳужум учун жавобгарликни Нитроген номли фидячи (рансомваре) хакерлар гуруҳи ўз зиммасига олди. Улар ўзларининг дарк-веб сайтида Фохконн тизимларига кириб борганликларини ва 11 миллиондан ортиқ файлни ўғирлаганликларини даъво қилмоқда. Ўғирланган маълумотлар орасида Apple, Dell, Google, Intel ва NVIDIA каби йирик мижозларнинг махфий ҳужжатлари бўлиши мумкинлиги айтилмоқда.
Хакерлар ўз даъволарини тасдиқлаш учун маҳсулот схемалари, йўриқномалар ва банк кўчирмаларидан иборат тасвирларни эълон қилди. Нитроген гуруҳи "икки томонлама товламачилик" тактикасидан фойдаланади: улар нафақат компания файлларини шифрлаб, фойдаланишни чеклайди, балки махфий маълумотларни ўғирлаб, уларни тарқатиб юбориш билан таҳдид қилади.
Ҳозирча Фохконн ушбу ҳодиса юзасидан аниқ тафсилотларни очиқламади ва хакерлар талаб қилаётган тўлов ёки тизимга етказилган зарар кўлами ҳақидаги саволларга жавоб бермади. Мутахассислар ушбу ҳолат глобал таъминот занжири учун жиддий хавф туғдириши мумкинлигидан хавотирда.
“Zamin”ни Telegram'да ўқинг!
