Янги тадқиқот шуни кўрсатдики, кўп уйқу хавфли касалликлар хавфини оширади. Кўп ухлаш сурункали уйқусизлик каби хавфли ҳисобланади. Marie Claire нашри кунига 8 соатдан кўп ухлаш саломатликка қандай зарар етказиши ҳақида маълумот берди.
Neurology журналида чоп этилган ирландиялик олимларнинг яқинда ўтказган тадқиқоти натижалари шуни кўрсатдики, кечаси тўққиз соатдан ортиқ ухлайдиган инсонларда инсулт хавфи ортади. “Бизнинг тадқиқотимиз шуни кўрсатадики, уйқу муаммолари инсултнинг олдини олишда диққат марказида бўлиши керак”, — дейди тадқиқотга бошчилик қилган олим Кристин Маккарти.
Ушбу тадқиқот давомида Голуэя университети олимлари 4496 кишининг маълумотларини таҳлил қилди, уларнинг ярмига яқини аллақачон инсултга учраган. Тадқиқот иштирокчиларининг ўртача ёши 62 ёшда эди, уларнинг учдан икки қисми эркаклар бўлган — 55 ёшдан ошган эркаклар юрак-қон томир касалликларининг энг юқори хавфи остида эканлигига ишонишади. Респондентлардан уларнинг уйқу хусусиятлари ҳақида сўровномани тўлдириш сўралган. Иштирокчилар кунига қанча ухлаши, уйқу сифати ва куннинг қайси вақтида ухлашлари ҳақидаги саволларга жавоб берган.
Маълум бўлишича, инсулт билан касалланганлар гуруҳида 151 киши тўққиз соатдан ортиқ ухлаган бўлса, инсултга чалинмаган инсонлар гуруҳида атиги 84 киши худди шунча вақт ухлаган.
Ҳаддан ташқари уйқу нима сабабдан инсулт хавфини ошириши ҳали аниқланмаган, бироқ тадқиқотчилар сабаблар иштирокчиларнинг бошқа турмуш тарзи ва соғлиғи хусусиятларида — камқонлик, руҳий тушкунлик, жисмоний ҳаракатсизлик ва бошқа нарсалар билан боғлиқ бўлиши мумкинлигини тахмин қилмоқда. Шунингдек, Healthline нашри маълумотларига кўра, мунтазам равишда кўп ухлаш бошқа муаммолар, жумладан, семизлик, қандли диабет ва юрак касалликлари билан боғлиқ эди.
Қизиғи шундаки, уйқусизлик инсулт хавфининг ортиши (тадқиқотда инсулт гуруҳидаги 162 киши беш соатдан кам ухлаган) ва гипертензия каби бир қатор бошқа ҳолатлар билан боғлиқ.
Олимлар катталар учун кунига 7-8 соат ухлашнинг белгиланган меъёрига риоя қилишни тавсия қилади, бу эса ортиқча уйқудан ҳам, уйқусизликдан қочишга ҳам ёрдам беради.
