Олимлар анорнинг юрак учун яширин фойдасини аниқлади

Лондон Қироллик коллежи олимлари анор, ёнғоқ ва айрим резавор мевалар истеъмол қилинганидан кейин организмда ҳосил бўладиган уролитин А моддаси юрак фаолиятини яхшилаши мумкинлигини аниқлади, деб хабар бермоқда Zakon.kz.

News-Medical нашри ёзишича, ҳайвонлар устида ўтказилган тажрибаларда ушбу модда юрак фаолияти кўрсаткичларини 80 фоизгача яхшилаган, унинг бўшашишига ёрдам берган. Шунингдек, юрак мушагида чандиқ тўқималари ҳосил бўлиши ва юрак мушагининг катталашиши камайган.

Ижобий таъсир лаборатория шароитида яратилган инсон юрак тўқималари моделларида ҳам кузатилган.

Тадқиқотчилар уролитин А моддасининг чиқариш фракцияси сақланган юрак етишмовчилигига таъсирини ўрганган. Бундай ҳолатда юрак қонни одатдагидек ҳайдайди, бироқ унинг мушаклари қаттиқлашиб, бўшашиш қобилияти пасаяди. Ушбу ҳолат юрак етишмовчилигининг барча ҳолатларининг қарийб ярмини ташкил этади.

Шу билан бирга, олимлар ҳозирча анор ёки уролитин А ёрдамида ушбу касалликни даволаш мумкинлиги ҳақида хулоса қилишга эрта эканини таъкидламоқда. Тадқиқот натижалари ҳайвонлар ва лабораторияда яратилган инсон юрак тўқималарида олинган. Модданинг инсон организмига таъсирини аниқлаш учун ҳали клиник синовлар ўтказилиши керак.