Соғлом организмнинг 9 та асосий белгиси

Организмда айрим ўзгаришлар турли касалликлардан дарак бериши мумкин. Бироқ танамиздаги баъзи белгилар, аксинча, соғлиқ ҳолати яхши эканини кўрсатади. “Новий очаг” нашри ана шундай 9 та белгини санаб ўтди.

1. Бош оғриғи кам кузатилади

Стресс, чарчоқ ёки жисмоний зўриқиш сабаб вақти-вақти билан бош оғриши табиий. Агар оғриқ тезда йўқолса, одатда хавотирга сабаб бўлмайди. Аммо тез-тез такрорланадиган ёки узоқ давом этадиган кучли бош оғриғига бефарқ бўлмаслик керак.

2. Қўл-оёқлар тез-тез увишмайди

Ноқулай ҳолатда узоқ вақт ўтириш ёки ётиш натижасида қўл-оёқларнинг увишиши одатий ҳолат. Бундай ноқулайлик тезда ўтиб кетса, жиддий муаммо бўлмаслиги мумкин. Увишиш тез-тез такрорланса ёки узоқ давом этса, шифокорга мурожаат қилиш мақсадга мувофиқ.

3. Оғиздан ёқимсиз ҳид келмайди

Оғиздаги доимий нохуш ҳид айрим касалликлар ёки оғиз бўшлиғидаги муаммолар билан боғлиқ бўлиши мумкин. Нафаснинг тоза ва ёқимсиз ҳидсиз бўлиши эса яхши гигиена ва соғлом ҳолат белгиларидан бири ҳисобланади.

4. Кун давомида энергия етарли бўлади

Эрталаб тетик уйғониш ва кун давомида энергия даражасининг кескин тушиб кетмаслиги организм яхши ишлаётганидан дарак бериши мумкин. Доимий ҳолсизлик ва тушликдан кейинги кучли чарчоқ эса эътибордан четда қолмаслиги керак.

5. Тери соғлом кўринади

Тери ҳам организмдаги жараёнларнинг ўзига хос кўрсаткичи. Тери ранги бир текис, ҳаддан ташқари қуруқ бўлмаса ва доимий тошмалар безовта қилмаса, бу ижобий белгидир.

6. Ичак фаолияти мунтазам

Ичакларнинг мунтазам ишлаши ҳазм тизими учун муҳим. Ич келишида узоқ танаффуслар кузатилиши, айниқса, қабзият доимий тус олса, мутахассис билан маслаҳатлашиш керак.

7. Пешоб ранги одатдаги оч тусда

Пешоб ранги организмдаги суюқлик миқдори ҳақида маълум тасаввур бериши мумкин. Одатда унинг ранги оч сариқ ёки тиниқроқ бўлади. Рангнинг кескин ўзгариши ёки қон аралашмаси кузатилса, бунга жиддий эътибор қаратиш лозим.

8. Тил пушти ва тоза бўлади

Тилнинг ранги ва ҳолати ҳам умумий саломатлик ҳақида айрим маълумотларни бериши мумкин. Одатда соғлом тил пушти рангда, ортиқча қопламаларсиз бўлади.

9. Камдан-кам шамоллайсиз

Йилига бир неча марта шамоллаш одатий ҳол бўлиши мумкин. Аммо вирусли касалликлар жуда тез-тез такрорланса ёки одам узоқ вақт давомида касалликдан чиқа олмаса, иммунитет ва умумий саломатлик ҳолатини текширтириш фойдали.

Шуни ҳам унутмаслик керакки, бу белгилар соғлиқнинг мутлақ кафолати эмас. Организмда ноодатий ёки узоқ давом этадиган ўзгаришлар кузатилса, шифокор кўригидан ўтиш энг тўғри йўл ҳисобланади.