Шакароб дунёнинг 42-энг ёмон таоми деб топилди

TasteAtlas гастрономик энциклопедияси дунёнинг энг ёмон 100 та таоми рейтинги эълон қилди. Ушбу рўйхатда Ўзбекистон ва Қирғизистонда машҳур бўлган Шакароб (аччиқ-чучук) салати 42-ўринни эгаллади.

TasteAtlas сайтида Шакароб ҳақида қуйидагича изоҳ берилган:
“Шакароб – оддий салат бўлиб, Ўрта Осиёдан келиб чиққан. Айниқса, Ўзбекистон ва Қирғизистонда машҳур. Унга помидор, пиёз, туз, майдаланган қизил ва қора қалампир киради. Помидор ва пиёз юпқа қилиб тўғралади, сўнгра зираворлар қўшилади ва истеъмол қилишга тайёр бўлади. Бу салат алоҳида порцияларда ёки гўшт билан гуручга гарнир сифатида дастурхонга тортилиши мумкин.”

Энг ёмон таомлар рейтингида биринчи ўринни Швециянинг қонли блинчиклари – «Blodplettar» эгаллаган. Иккинчи ўринда Финляндиянинг «Blodpalt» таоми (жавдар уни ва ҳайвонларнинг қони ёрдамида тайёрланади), учинчи ўринда эса Швециянинг гамбургер ва картошка билан тўлдирилган «Kalskrov» пиццаси қайд этилган.

TasteAtlas бутун дунё бўйлаб таомлар ва маҳсулотлар ҳақида маълумот тўплайдиган гастрономик энциклопедиядир. У фойдаланувчилар овози, мутахассисларнинг шарҳлари, машҳурлик, пазандачилик мероси каби мезонларни ҳисобга олади. Рейтинг мунтазам янгиланиб боради. “Замин” янгиликларини “Telegram”да кузатиб боринг