Uzoq kutilgan Shanxay avtokoʻrgazmasi yaqinda oʻz nihoyasiga etdi. Odatga koʻra, mahalliy ishlab chiqaruvchilar oʻzining eng yangi modellari bilan qatnashdi. Ular orasida hashamati, tezkorligi bilan aqlni shoshirib qoʻyadiganlari ham bor. Quyida Xitoydagi avtosalonda taqdim etilgan ayrim modellar haqida hikoya qilinadi.
Voyah i-Cozy
Voyah’ning kutilmagan ishlanmasi — i-Cozy. Kontsept-karda siz boshqarish uchun rul yoki gaz, tormoz pedallarini uchratmaysiz. Salonda kirganda 4 kishiga moʻljallangan oʻrindiqlarni koʻrasiz. Old oʻrindiqlar mos ravishda orqaga aylana oladi. Haydovchi uni ortga oʻgirib, yoʻlovchilar bilan yuzma-yuz bemalol suhbat qurishi mumkin, albatta, toʻxtagan holatda. Old panelning deyarli butun qismini ekran egallagan.
Hongqi E-LS
Xitoyning taniqli brendi Hongqi ham yangi kontsept-kar boshqaruvida rul va pedallardan voz kechgan. Salon qismi xuddi Voyah’nikiga oʻxshab ketadi. Avtomobilni 2025 yilda seriyali ishlab chiqarish reja qilinmoqda. U gibrid yoki faqat elektrda harakatlanadigan versiyada taqdim etilishi aytilmoqda.
iCar GT
Chery kompaniyasi Shanxaydagi koʻrgazmada oʻz subbrendi ostida biryoʻla ikki yangi modelini namoyish qildi. Birinchi model bu ikki oʻrindiqli, eshiklari tepaga koʻtarib ochiladigan elektromobil — iCar GT. Sportkarning ortki chiroqlari T harfi koʻrinishida ishlangan. Aylana rul oʻrni esa samolyot shturvaliga oʻxshatib ishlashgan. Old panelda katta monitor ham oʻrnatilgan. Gʻildiraklar esa yorituvchi chiroqlar bilan jihozlangan.
iCar 03
Chery’ning ikkinchi yangiligi Land Rover Defender uslubida ishlangan, oldni yorituvchi chiroqlari vertikal koʻrinishdagi elektrda harakatlanadigan ixcham krossover — iCar 03 boʻldi. U haydovchi uchun kerak boʻladigan barcha zamonaviy elektron assistentlar va ikkinchi darajali avtopilot bilan jihozlangan. Biroq texnik jihati borasida ma'lumotlar taqdim etilmagan.
Beijing BJ60 Niying Edition
Baic kompaniyasi avtokoʻrgazmada Mercedes-Maybach kabi ishlangan oʻta hashamatli modeli bilan ishtirok etdi. Ha, hozircha modelning kontseptligi aytilmoqda, biroq uning bozorga chiqishi ham rad etilmayapti. U 22 oʻlchamli gʻildiraklari bilan yaqqol ajralib turadi, bamper va radiator panjaralarida xromdan foydalanilgan. Salonga oq rangli nappa teridan ishlov berilgan.
Great Wall Poer CyberP!ckup
6 gʻildirakli pikap oʻzida bir nechta qiziqarli xususiyatlarni jamlagan. 3 litr hajmga ega benzinli V6 dvigateli 9 pogʻonali avtomat uzatmalar qutisi bilan birga ishlaydi. Jami ot kuchi esa 517 tani tashkil etadi. Salon qismida oq rangli teri va alkantaradan foydalanilgan. Akustikasiga boʻlsa 16 ta karnay javob beradi. Pikap cheklangan nusxada ishlab chiqarilishi mumkin.
Yangwang U8
BYD uzunligi 5,3 metrni tashkil etadigan yoʻltanlamasi bilan koʻrgazma muxlislarini ham, qatnashchilarini ham ajablantirdi. Uning 100 km tezlik olishi uchun 3 soniya kifoya qiladi. Buni esa 1100 ot kuchiga ega toʻrtmotorli dvigatel amalga oshiradi.
