Pekinda bo'lib o'tayotgan xalqaro avtosalonda BYD tarkibiga kiruvchi "Yangwang" premium brendi o'zining yangilangan modellarini taqdim etdi. Ko'rgazmaning asosiy yangiliklaridan biri "Yangwang U8L" uzaytirilgan yo'ltanlamasi bo'ldi. Ushbu modelning g'ildirak bazasi 200 mm ga oshirilib, 3250 mm ga yetkazildi. Avtomobilning umumiy uzunligi 5400 mm ni tashkil etadi. Tashqi ko'rinishdagi o'zgarishlar qatorida kuzov rangidagi g'ildirak arkalari va 23 dyuymli maxsus disklar mavjud. Shuningdek, mijozlar uchun 24 karatli oltin bilan bezatilgan dekorativ elementlarga buyurtma berish imkoniyati yaratildi. Bu haqda Tarantas.news xabar beradi.
"Yangwang U8L" modeli 1197 ot kuchi va 1280 Nm aylanish momentiga ega to'rtta elektromotorli tizim bilan jihozlangan. Avtomobilning umumiy vazni 4210 kg gacha oshgan bo'lsa-da, uning dinamik ko'rsatkichlari yuqori darajada saqlab qolingan. Ko'rgazmada shuningdek, "Yangwang U7" sedani ham namoyish etildi. Ushbu elektromobil 1306 ot kuchiga ega bo'lib, bir marta quvvatlanishda 800 km masofani bosib o'ta oladi. Avtomobil salonida 12,8 dyuymli egilgan markaziy ekran va yo'lovchilar uchun alohida displeylar o'rnatilgan.
Tadbirning eng shov-shuvli premyerasi "Yangwang U9 Xtreme" elektr giperkari bo'ldi. Ushbu model atigi 30 nusxada ishlab chiqariladi. Uning umumiy quvvati 3000 ot kuchidan oshadi va har bir g'ildirak mustaqil boshqaruv tizimiga ega. Elektronika soniyasiga 100 martadan ortiq yo'l qoplamasini tahlil qilib, tortish kuchini taqsimlaydi. Bu kabi texnologik yechimlar brendning hashamat va yuqori texnologiyalar sohasidagi yangi davrini boshlab berishi kutilmoqda.
“Zamin”ni Telegramʻda oʻqing!
