Rossiyaning "AvtoVAZ" kompaniyasi yiliga 70 ming donagacha Lada Azimut krossoverini ishlab chiqarishni rejalashtirmoqda. Ushbu model "Vesta" platformasi negizida yaratilgan boʻlib, uning uchun mingga yaqin original komponentlar, jumladan, yangi kuzov panellari va orqa osma tizimi ishlab chiqilgan. Bu haqda Ixbt.com xabar beradi.
Avtomobilning seriyali ishlab chiqarilishi 2026-yilning sentyabr oyiga moʻljallangan. Dastlabki bosqichda krossover 1,6 va 1,8 litrli atmosferali dvigatellar, 6 pogʻonali mexanik uzatmalar qutisi yoki variator bilan taklif etiladi. Keyinchalik 150 ot kuchiga ega turbomotorli va klassik avtomat uzatmali versiyalar ham paydo boʻladi.
Shuningdek, kompaniya Lada Azimut negizida gibrid modelni ham ishlab chiqmoqda. 2026-yilning uchinchi choragida taqdim etilishi kutilayotgan ushbu versiya 394 ot kuchi quvvatga, toʻliq uzatmalar tizimiga va 1100 kilometrgacha masofani bosib oʻtish imkoniyatiga ega boʻlishi aytilmoqda.
Yangi krossover jihozlanishi boʻyicha ham ajralib turadi. Model 10 dyuymli media tizim ekrani, panoramali tom va oldingi yon oynalarni isitish tizimi kabi qulayliklar bilan taʼminlanadi.
“Zamin”ni Telegramʻda oʻqing!
