Aurus brendining arzonroq va xalqchil subbrendi sifatida taqdim etilgan Senat kompaniyasi oʻzining ilk modeli — Senat 900 sedanining rasmiy suratlarini va texnik xususiyatlarini eʼlon qildi. Ushbu avtomobil Hongqi H9 modelining chuqur modernizatsiya qilingan versiyasi hisoblanib, oʻzining yirik oʻlchamlari bilan vakillik sinfidagi sedanlar qatoridan joy oladi. Bu haqda Ixbt.com xabar beradi.
Avtomobil 3,0 litrli, 326 ot kuchiga ega V6 turbomotor bilan jihozlangan. 450 Nm aylanish momentiga ega dvigatel 8 pogʻonali avtomat uzatmalar qutisi va toʻliq uzatmali tizim bilan hamkorlikda ishlaydi. Ishlab chiqaruvchining maʼlumotlariga koʻra, sedan 100 km/soat tezlikka 6,5 soniyada erishadi.
Modelning jihozlanishiga pnevmatik osma tizim, shovqinni yutuvchi maxsus qatlamlar, tabiiy teri va yogʻochdan ishlangan interyer hamda orqa oʻrindiqlar uchun massaj funksiyasi kiradi. Shuningdek, media tizim toʻliq rus tiliga moslashtirilgan boʻlib, foydalanuvchilar uchun qulay interfeysni taqdim etadi.
Senat 900 modelining ommaviy taqdimoti 2026-yil 4-iyun kuni Peterburg xalqaro iqtisodiy forumida boʻlib oʻtadi. Avtomobillarni ishlab chiqarish Sankt-Peterburgdagi sobiq Toyota zavodida yoʻlga qoʻyilishi rejalashtirilgan, bu yerda avval Toyota RAV4 va Toyota Camry modellari yigʻilgan edi.
“Zamin”ni Telegramʻda oʻqing!
