vRS belgisi Škoda tarixida o'ziga xos o'ringa ega. 1970-yillardagi 130 RS ralli avtomobillaridan boshlangan bu an'ana 2001-yilda Octavia vRS modeli bilan yo'l avtomobillariga ko'chdi. "Victory Rally Sport" deb nomlanuvchi ushbu modifikatsiya kundalik foydalanish qulayligini saqlab qolgan holda, avtomobilga yuqori unumdorlik bag'ishlaydi. Endilikda bu formula elektr davriga moslashtirilib, ixcham krossover segmentida yangi bosqichga chiqdi. Bu haqda Autocar.co.uk xabar beradi.
Škoda Elroq vRS brendning 130 yillik tarixidagi eng tezkor yo'l avtomobili hisoblanadi. Ikki dvigatelli tizim jami 340 ot kuchi va 545 Nm aylanish momentini taqdim etadi. To'liq uzatmali tizim va bir pog'onali avtomat uzatmalar qutisi yordamida elektromobil 0 dan 100 km/soat tezlikka 5,4 soniyada erishadi. Autocar mutaxassislari quvvatning silliq va boshqarish oson tarzda uzatilishini alohida ta'kidlashdi.
Muhandislar shassini ham tubdan qayta ko'rib chiqishdi. Oddiy Elroq modeliga nisbatan vRS versiyasi old tomondan 15 mm, orqa tomondan esa 10 mm pastroq joylashgan. Dynamic Chassis Control tizimi amortizatorlarning qattiqligini 15 xil darajada sozlash imkonini beradi. Natijada, avtomobil BMW 5 Series darajasidagi qulaylik va barqarorlikni namoyish etadi.
Tashqi ko'rinishda vRS o'ziga xos bamperlar, porloq qora detallar va 20 dyuymli Draconis g'ildirak disklari bilan ajralib turadi. Old qismdagi Tech-Deck Face paneli datchiklarni yashirib, dizaynning tozaligini ta'minlaydi. Bu avtomobil o'zining vazmin uslubi va yuqori texnik imkoniyatlari bilan har qanday yo'l sharoitida ishonchli hamroh bo'la oladi.
“Zamin”ni Telegramʻda oʻqing!
