Seat kompaniyasi ishlab chiqarish xarajatlari kamayishi bilan oʻzining yangi elektromobillarini taqdim etishni rejalashtirmoqda. Kompaniya rahbariyatining taʼkidlashicha, brend shunchaki Cupra modellarini qayta jihozlash bilan cheklanib qolmaydi, balki kelajakda butunlay alohida modellar qatoriga ega boʻladi. Bu haqda Autocar.co.uk xabar beradi.
Yaqinda Seat uzoq tanaffusdan soʻng Ibiza supermini va Arona krossoverining yangilangan versiyalarini namoyish etdi. Bu 2020-yilda toʻrtinchi avlod Leon modeli chiqqanidan beri brendga kiritilgan birinchi yirik sarmoyadir. Kelasi yili ushbu modellar uchun yangi mild-hybrid dvigatellari ham taqdim etilishi kutilmoqda.
Hozirda Ateca va Tarraco SUV modellari ishlab chiqarishdan olingani sababli, Seat qatori faqat uchta benzinli model bilan cheklangan. Kompaniya asosiy resurslarni tez rivojlanayotgan Cupra brendiga yoʻnaltirayotgan boʻlsa-da, bosh direktor Markus Haupt Seat brendi hali ham kompaniya uchun muhim meros ekanligini va unga sarmoya kiritish davom etishini taʼkidladi.
Hauptning soʻzlariga koʻra, 2029-2030 yillarga borib CO2 emissiyasi boʻyicha talablar qatʼiylashganda, brendning kelajagi haqida jiddiyroq muhokamalar boshlanadi. Hozirgi vaqtda elektromobil platformalarining yuqori narxi Seat kabi hamyonbop brendlar uchun asosiy toʻsiq boʻlib qolmoqda, biroq xarajatlar kamayishi bilan vaziyat oʻzgarishi mumkin.
Seat va Cupra brendlari butunlay boshqa mijozlar qatlamiga va bozor pozitsiyasiga ega. Seat asosan ichki yonuv dvigatelli va hamyonbop avtomobillarga eʼtibor qaratadi, bu esa elektrlashtirish jarayoni sekin kechayotgan Yevropadan tashqaridagi bozorlar uchun juda muhimdir.
“Zamin”ni Telegramʻda oʻqing!
