J.D. Power kompaniyasining Xitoy boʻlinmasi Tech Experience Index (TXI) tadqiqoti natijalariga koʻra, 2026-yilning eng “aqlli” avtomobil brendlari reytingini eʼlon qildi. Mazkur tadqiqot 2025-yil mayidan 2026-yil fevraligacha yangi mashina sotib olgan 32 813 nafar egalari oʻrtasida oʻtkazildi. Unda Xitoyning 81 ta shahridagi 255 ta model ishtirok etdi. Bu haqda Ixbt.com xabar beradi.
Umumiy TXI indeksi oʻrtacha 658 ballgacha koʻtarilgan boʻlsa-da, soʻnggi toʻrt yil ichida ilk bor aqlli funksiyalarning ishlash sifati pasaygani qayd etildi. Foydalanuvchilar koʻpincha haydovchiga koʻmaklashuvchi assistentlarning beqaror ishlashidan shikoyat qilmoqdalar. Reytingda Huawei tomonidan qoʻllab-quvvatlanadigan Aito brendi 815 ball bilan mutlaq yetakchiga aylandi.
Keyingi oʻrinlarni Denza (806), Zeekr (794), Avatr (787), Li Auto (786) va Xiaomi (782) egalladi. Shuni taʼkidlash joizki, Zeekr oʻzining avvalgi yetakchilik mavqeini boy bergan. Elektromobillar segmentida raqobat keskinlashib borayotgani ushbu koʻrsatkichlarda yaqqol namoyon boʻlmoqda.
Ichki yonuv dvigatelli premium avtomobillar segmentida Mercedes-Benz (703) eng yaxshi natijani qayd etdi. Undan keyingi pogʻonalarni BMW (683), Porsche (680) va SAIC Audi (668) egalladi. Ommaviy benzinli markalar orasida esa Tank (668) brendi peshqadamlik qilmoqda.
Ommaviy segmentning boshqa vakillari orasida GAC (637), Changan (635), Chery (635), Jetour (634) va Lynk & Co (633) kabi brendlar ham yuqori oʻrinlardan joy oldi. Shuningdek, roʻyxatda Haval, Geely, Buick va Hongqi kabi markalar ham oʻz koʻrsatkichlari bilan qayd etilgan.
“Zamin”ni Telegramʻda oʻqing!
