Geely xoldingiga tegishli Lynk & Co brendi Xitoy bozorida oʻzining yangi Lynk & Co 10 va Lynk & Co 10+ sedanlarini rasman taqdim etdi. Bazaviy Lynk & Co 10 modeli uch xil versiyada taklif etilmoqda va uning narxi 170 mingdan 192 ming yuangacha belgilangan. Kuchliroq Lynk & Co 10+ versiyasi esa ikki xil komplektatsiyada, mos ravishda 220 ming va 236 ming yuan (taxminan 31-33 ming dollar) narxda sotuvga chiqdi. Bu haqda Ixbt.com xabar beradi.
Yangi avtomobillarning oʻlchamlari 5050 × 1966 × 1468 mm ni, gʻildirak bazasi esa 3005 mm ni tashkil etadi. Kapot ostida 66 litrli qoʻshimcha yukxona mavjud. Lynk & Co 10+ modeli agressiv tashqi koʻrinish va 109,1 kg qoʻshimcha bosim kuchini hosil qiluvchi karbonli spoiler bilan jihozlangan. Shuningdek, xaridorlarga imtiyozli kreditlar va trade-in bonuslari ham taklif etilmoqda.
Salonda 12,7 dyuymli raqamli asboblar paneli, 25,6 dyuymli proeksion ekran hamda Snapdragon 8295 chipida ishlovchi 15,4 dyuymli Flyme Auto 2 multimedia tizimi oʻrnatilgan. Avtomobil 23 ta dinamikli 1600 vattli audiotizim va Qianli Haohan avtonom boshqaruv tizimi bilan taʼminlangan. Yuqori versiyalarda yanada ilgʻor H7 tizimi qoʻllaniladi.
Texnik koʻrsatkichlarga koʻra, Lynk & Co 10 bitta 503 ot kuchiga ega motor bilan jihozlangan va bir quvvatlanishda 816 km yoʻl bosadi. Lynk & Co 10+ esa 924 ot kuchiga ega ikki motorli tizimga ega boʻlib, 100 km/soat tezlikka atigi 3,2 soniyada erishadi. Uning masofaviy zaxirasi 536 km ni tashkil qiladi. Barcha versiyalar adaptiv amortizatorli mustaqil osma bilan jihozlangan.
“Zamin”ni Telegramʻda oʻqing!
