Erdog‘an Saudiya Arabistoni yetakchilari bilan Qoshiqchi o‘ldirilishidan keyin ilk bor uchrashdi

Turkiya prezidenti Rajab Toyyib Erdog‘an 2018 yilda Saudiya Arabistonining Istanbuldagi konsulligida saudiyalik jurnalist Jamol Qoshiqchi o‘ldirilganidan keyin 2017 yildan beri ilk bor Saudiya Arabistoniga tashrif buyurdi. U safari chog‘ida 28 aprel kuni kechqurun qirol Salmon va valiahd shahzoda Muhammad bin Salmon bilan uchrashdi.

Erdog‘anga katta delegatsiya, jumladan vazirlar va yuqori martabali amaldorlar hamrohlik qildi, deb xabar bermoqda Anadolu agentligi.

Erdog‘an muzokaralardan so‘ng tvitter sahifasida “Saudiya Arabistoni bilan sog‘liqni saqlash, energetika, oziq-ovqat xavfsizligi, qishloq xo‘jaligi texnologiyasi, mudofaa sanoati va moliya kabi sohalarda hamkorlikni kengaytirish umumiy manfaatimizga xizmat qiladi deb hisoblaymiz” dedi.

“Biz terrorizmga qarshi kurashda hamkorlik muhimligini ta’kidlaymiz, chunki biz terrorning barcha turlarini qoralaymiz”, dedi u.

Anqara 2011 yildagi “arab bahori”dan keyin ko‘p yillik qarama-qarshiliklardan so‘ng Saudiya Arabistoni bilan iqtisodiy munosabatlarni tiklash uchun so‘nggi bir yil ichida diplomatik harakatlar qildi.

Bir vaqtlar Turkiya uchun asosiy bozor bo‘lgan Saudiya Arabistoniga eksport hajmi Jamol Qoshiqchi 2018 yilda Istanbulda o‘ldirilishidan keyin keskin kamaydi.

Turkiya Saudiya Arabistoni bilan keng miqyosdagi savdo shartnomasini imzolamoqchi, chunki Turkiyaning mamlakatga eksporti 3,2 milliard dollardan 2021 yilda 200 million dollarga kamayib ketgan. “Zamin” yangiliklarini “Youtube”da kuzatib boring