Germaniyada 350 ming Ukraina fuqarosi bandlik markazlarida ro‘yxatdan o‘tdi

^{Foto: IMAGO}
Germaniyaga urushdan qochgan qariyb 900 ming ukrainalikdan 350 mingdan ortig‘i ish qidirish uchun ro‘yxatga olindi. Ish bilan ta’minlashdagi asosiy qiyinchiliklar til va bir vaqtning o‘zida bolalarni nazorat qilish zarurati hisoblanadi.

Urush boshlanganidan beri Germaniyaga 870 mingdan ortiq ukrainalik kelgan, ulardan 350 mingga yaqini butun mamlakat bo‘ylab bandlik markazlarida ro‘yxatdan o‘tgan, deb xabar berdi RND dushanba, 11 iyul kuni Federal mehnat agentligi (Bundesagentur für Arbeit, BA) ma’lumotlariga tayanib.

Jami 876 461 ukrainalik Germaniyaga kelgan, deya xabar berdi BA. Bandlikka ko‘maklashish markazlari va shunga o‘xshash shahar muassasalarida 353 ming 424 nafar, shu jumladan, 265 ming nafar mehnatga layoqatli yoshdagilar ro‘yxatga olingan. 121 ming ukrainalik bolalar uchun nafaqa olishga ariza topshirdi, deb yozadi RND.

Urush boshidan buyon mamlakatga kelgan Ukraina fuqarolari uchun 144 ming integratsiya kurslari tasdiqlandi. Ular chet elliklarga mamlakatning kundalik hayotiga ko‘nikish, til o‘rganish va ish topishga yordam beradigan maxsus kurslardir.

Tegishli bo‘sh ish o‘rinlarini topishdagi qiyinchiliklar nomzodlarning aksariyati (75 foizdan ortig‘i) ayollar ekani bilan bog‘liq, ular bir vaqtning o‘zida kurslarga qatnab, bolalarga qarashi kerak, deyiladi BA hisobotida. Ish beruvchilar til bilmaslikni yana bir jiddiy to‘siq deb atayapti.

Agentlik mehnat bozoridagi vaziyatni «barqaror» deb ko‘rsatmoqda. «Ukrainalik qochqinlar mehnat bozorida qay darajada uzoq muddatli rol o‘ynashi voqealar rivojiga va ularning mamlakatda qancha vaqt qolishiga bog‘liq», deyiladi BA hisobotida. Qochqinlar oqimi har qanday holatda ham ishsizlikning oshishiga olib keladi, chunki urushdan qochgan suriyaliklardan farqli o‘laroq, Ukraina fuqarolari Hartz IV nafaqasini oladi va mehnat bozoriga qo‘shilish huquqiga ega, deb yozadi idora. “Zamin” yangiliklarini “Youtube”da kuzatib boring