Ukraina jang zonasida birinchi marta Eron dronini urib tushirganini ma'lum qildi

^{Foto: LETA}
Ukraina Qurolli kuchlari strategik kommunikatsiyalar boshqarmasi ma'lum qilishicha, Xarkov viloyatining Kupyansk shahri yaqinida «katta ehtimol bilan» Eronda ishlab chiqarilgan zarbdor uchuvchisiz uchar qurilma urib tushirilgan, deb yozadi Meduza.

"Dron qanotidagi elementlar tashqi koʻrinishining tahlili Ukraina Qurolli kuchlari birinchi marta Eron uchuvchisiz uchar qurilmasini yoʻq qilganini da'vo qilish imkonini beradi. Gap uzoq masofali Shahed-136 kamikadze droni haqida bormoqda", — deyiladi boshqarma xabarida.

13 sentyabr kuni ertalab Ukraina Qurolli kuchlari ofitseri Twitter’da Kupyansk yaqinida urib tushirilgan dron suratini e'lon qilgan. Dronda kirillcha «M214 Geran-2» yozuvini koʻrish mumkin, «biroq tashqi koʻrinishidan korpus Eronning uzoq masofali zarbdor Shahed-136 kamikadze droni bilan bir xil».

Avgust oʻrtalarida, The Washington Post’ning AQSh razvedkasidagi manbalariga koʻra, Rossiya Erondan Ukrainadagi urush uchun zarbdor dronlarning birinchi partiyasini qabul qilib olgan. Rossiyaga, razvedka ma'lumotlariga qaraganda, dushman mudofaasidagi radarlar va artilleriyaga hujum qilishga qodir Mohajer-6 va Shahed seriyasidagi ikki xil uchar qurilmalar yuborilgan. Eron ularni etkazib berganini rad etdi. Kremlda bu haqdagi ma'lumotlar dezinformatsiya deb ataldi.

Sentyabrda The New York Times gazetasi va boshqa Gʻarb OAVlari AQSh razvedkasiga tayanib, Rossiya Shimoliy Koreyadan millionlab artilleriya snaryadlari hamda kichik va oʻrta masofali raketalar sotib olayotgani haqida yozdi. “Zamin” yangiliklarini “Telegram”da kuzatib boring