Erdoʻgʻon Putin va Zelenskiy bilan telefon orqali muloqot qiladi

^{Foto: APA}
Turkiya prezidenti Rajab Toyyib Erdoʻgʻon 11 dekabr kuni rossiyalik hamkasbi Vladimir Putin bilan telefon orqali muloqot qilishni rejalashtirayotganini aytdi. Bu haqda Anadolu xabar berdi.

Siyosatchi Ukraina prezidenti Vladimir Zelenskiy bilan ham gaplashmoqchi ekanini qayd etdi. U Putin bilan suhbat mavzusi don koridori boʻlishini aytib, Ukraina rahbari bilan nima haqida gaplashishiga aniqlik kiritmadi. Turkiya prezidenti urushni tugatish boʻyicha diplomatik sa'y-harakatlar «urushda gʻolib, tinchlikda esa magʻlub boʻlishi mumkin emasligiga» qaratilganini aytdi.

Erdoʻgʻon Rossiya–Ukraina urushi butun dunyoga jiddiy siyosiy, gumanitar va iqtisodiy zarar etkazganini aytdi va Ukrainaning hududiy yaxlitligini qoʻllab-quvvatlashini qoʻshimcha qildi.

«Shu bilan birga, Rossiyaga qarshi aqlga sigʻmaydigan siyosat orqali mintaqada qarama-qarshiliklarni qoʻzgʻatishga qarshi chiqdik», — dedi u.

Turkiya prezidenti Rossiya va Ukraina prezidentlari bilan boʻlgan koʻplab suhbatlar haqida ham gapirdi. Uning ta'kidlashicha, Anqaraning barcha harakatlari Qora dengiz mintaqasida tinchlikka erishishga qaratilgan.

«Rossiya va Ukraina oʻrtasidagi muloqotning Istanbul jarayoni toʻxtatilganiga qaramay, bu platforma haligacha uzoq muddatli tinchlik uchun eng ideal platforma boʻlib qolmoqda», — dedi Erdoʻgʻon. “Zamin” yangiliklarini “Telegram”da kuzatib boring