Prigojin Baxmut «to‘liq» ishg‘ol etilganini aytdi, Ukraina buni rad qildi

^{Videodan kadr}

«Vagner» XHK asoschisi Yevgeniy Prigojin Ukrainaning Baxmut shahri «to‘liq» ishg‘ol etilganini e’lon qildi. Uning so‘zlariga ko‘ra, bu 20 may kuni tushda sodir bo‘lgan. Prigojinning Ukraina shahri vayronalari fonida qo‘lida Rossiya bayrog‘i bilan turgani aks etgan video uning matbuot xizmati tomonidan e’lon qilindi.

Videoda u «Baxmut go‘sht maydalagichi» deb atagan Baxmutni ishg‘ol etish operatsiyasi 2022 yil 8 oktyabrda «jabrlangan Rossiya armiyasining o‘ziga kelishi uchun» boshlangani va 224 kun davom etganini ta’kidlagan.

U qo‘shimcha ravishda bu operatsiya faqat «Vagner» tomonidan amalga oshirilganini aytdi.

«Bu yerda Konashenkov aytganidek, havo-desant kuchlari yoki bizga yordam bera oladigan boshqa hech kim yo‘q edi. Biz o‘zimizga o‘zimiz yordam berdik», dedi Prigojin.

Shuningdek, «Vagner» rahbari 25 maydan boshlab jangchilari «dam olish va qayta tayyorgarlikdan o‘tish» uchun shahardan olib chiqilishini aytdi. Uning ta’kidlashicha, bundan oldin «mudofaa chiziqlari» yaratiladi va Rossiya harbiylariga topshiriladi. Uning yollanma jangchilari esa «Rossiyaga yordam kerak bo‘lganda» qaytib keladi.

Shu bilan birga, Ukraina Qurolli kuchlari Sharqiy guruhi vakili Sergey Cherevatiy Prigojinning bayonotini rad etdi. Uning so‘zlariga ko‘ra, Ukraina harbiy qismlari Baxmutning janubi-g‘arbiy qismida turibdi va o‘z pozitsiyalarini himoya qilmoqda. Shu bilan birga «dushmanning shaharni ishg‘ol etishishga yo‘l qo‘ymaydi».

Ukraina mudofaa vazirining o‘rinbosari Anna Malyar Ukraina Qurolli kuchlari Baxmutdagi «Samolyot» kvartalini va unga tutash xususiy sektorni egallab turganini ta’kidladi.

Rossiya rasmiylari Prigojinning bayonotlariga hozircha izoh bermadi.

O'zbekiston yangiliklari Yangiliklar