Checheniston rahbari Ramzan Qodirov «Vagner» xususiy harbiy kompaniyasi rahbari, avvalroq oʻzi bilan dahanaki jangga borgan Eveniy Prigojin boshlagan harbiy isyonga ilk marta munosabat bildirdi.
«Tun qiyin oʻtdi. Otishmalar sabab bu xiyonatga munosabat bildirishga ham vaqt boʻlmadi. Boʻlayotgan ishlar ortdan pichoq urish va harbiy isyondir.
Urush shaxsiy adovat haqida gapiradigan vaqt emasligi haqida koʻp gapirganman. Qarshisida dushman, ortida esa xiyonat boʻlgan okopdagi askarlar nimani his qilayotganini tasavvur qiling. Tarix bunday voqealar oqibatida koʻp qon toʻkilishiga guvoh boʻlgan. «Maxsus harbiy amaliyot»dagi yoʻqotishlar kam edimi? Endi mamlakat ichikarisidagi muammolarni ham hal qilishimiz kerakmi?
Bizda vaziyatni ikir-chikirigacha biladigan, holatni qandaydir tadbirkordan yaxshiroq tushunadigan xalq saylagan oliy bosh qoʻmondon bor. Vladimir Vladimirovich oʻz murojaatida aytganidek, bu harbiy isyon va bu ishni oqlab boʻlmaydi. Vladimir Putinning har bir soʻzlarini qoʻllab-quvvatlayman.
Vatanimiz jangchilariga yuzlanib provakatsiyaga uchmasliklarini soʻramoqchiman. Bu holatdan Gʻarbdagi dushmanlarimiz qanday foydalanayotganini koʻrib qoʻying. Ular odamlarimizni qoʻrqitish uchun uydirmalar tarqatishmoqda. Prigojining xoinlarcha marshidan shunday boʻlishi kutilayotgandi ham.
Bu Mudofaa vazirligiga emas, butun davlatimizga chaqiruv. Chechenistondagi Rosgvardiya va Mudofaa vazirligi jangchilari keskinlik qayd etilgan hududlarga joʻnab ketishgan. Biz Rossiyaning birligini ta'minlash uchun qoʻlimizdan kelganini qilamiz. Isyon bostirilishi kerak. Bu uchun keskin choralash koʻrish kerak boʻlsa, biz tayyormiz», deb yozdi Qodirov 3 milliondan ortiq obunachisi bor Telegram-kanalida.
“Zamin” yangiliklarini “Telegram”da kuzatib boring
