Sadir Japarovdan qirg‘izlarni haqorat qilgani uchun uzr so‘rash talab qilindi

^{Foto: “President.kg”}

Facebook ijtimoiy tarmog‘i foydalanuvchisi Aida Sasibayeva Qirg‘iziston prezidenti Sadir Japarovdan qirg‘iz xalqini haqorat qilgani uchun uzr so‘rashni talab qildi, deb yozmoqda “24.kg” axborot agentligi.

Aida Sasibayeva prezident qirg‘izlarni dangasa deb atagani unga yoqmaganini ta’kidladi.

“Bu mening milliy qadr-qimmatimga putur yetkazadi, sizdan kechirim so‘rashni talab qilmoqchiman. Mulohazasiz fikrlaringiz bilan mening vatanim va xalqim obro‘sini tushiryapsiz. Bunday kamsituvchi tavsif tufayli boshqa mamlakatlarda biz haqimizda noxush fikr paydo bo‘lishi mumkin. Bundan tashqari, bunday toksik munosabat bolalarga salbiy ta’sir qiladi, bolalarning o‘zi haqidagi, ota-onasi, qarindoshlari va butun xalqi haqidagi tasavvurlarini buzadi”, — deb yozdi Sasibayeva.

Aida Sasibayeva prezident “o‘ziga kelib, omma oldida kechirim so‘rashiga” umid bildirdi.

“Aks holda, men barcha ijtimoiy tarmoqlarda flesh-mob e’lon qilishga majbur bo‘laman. Aksiyaga yetarlicha odam qo‘shilishi bilan uni boshlash sanasini aniqlaymiz”, — dedi u.

Uning so‘zlariga ko‘ra, norozilik aksiyasi siyosiy yoki madaniy emas, balki umumrespublikaviy bo‘ladi.

Avvalroq Sadir Japarov Transport va kommunikatsiyalar vazirligiga yo‘l texnikasini topshirish marosimida qozog‘istonlik va qirg‘izistonlik yo‘l quruvchilar haqida latifa aytgandi. Shundan so‘ng Japarov qirg‘izlarning “dangasaligi tufayli” prezident ma’muriyatiga mo‘ljallangan bino sekin qurilayotganini ta’kidladi.

Yangiliklar