Rossiya Qurolli kuchlari leytenanti Ivan Korolev Litva chegarasini noqonuniy kesib o‘tib, siyosiy boshpana so‘radi. Bu haqda Korolevga tayanib, BBC rus xizmati xabar berdi.
Harbiy xizmatchi 59313-39-sonli (“Sharqiy harbiy okrugning birlashgan strategik qo‘mondonligi”) harbiy qismda xizmat qilgan. Bu qism Xabarovsk o‘lkasining Teysin qishlog‘iga joylashtirilgan.
Korolev Vilnyusga yetib olishga muvaffaq bo‘lgan va u yerda 10-avgust kuni Litva chegara xizmati tezkor xodimlari tomonidan avtovokzalda qo‘lga olingan. Shundan so‘ng u chegara postiga qaytarilib, u yerda yana bir kun qolgan.
Korolevning so‘zlariga ko‘ra, 3-avgust kuni u “qonli urushda” qatnashishni istamagani sababli Rossiyani tark etishga qaror qilgan.
“Men ‘maxsus harbiy operatsiya’da qatnashdim, lekin shu vaqtgacha Rossiya hududida edim. Ukrainada bo‘lmaganman, biz rus qo‘shinlarini o‘q-dorilar bilan ta’minlash bo‘yicha shug‘ullanardik. Rossiyadagi barcha bo‘linmalardan o‘q-dorilarni olib, ularni to‘g‘ridan-to‘g‘ri Ukrainadagi brigadalarga, bo‘linmalarga tarqatdik”, — deydi leytenant.
U artilleriya omborining hisob va ekspluatatsiya bo‘limi boshlig‘ining o‘rinbosari ekanini aytdi. Korolevning boshpana haqidagi arizasi ko‘rib chiqish uchun qabul qilingan. Shundan so‘ng u Pabradedagi migratsiya markaziga yuborilgan.
“Zamin”ni Telegramʻda oʻqing!
