267
Foto: RBK
Moskvaning Lefortovo sudi asli kelib chiqishi rossiyalik bo‘lgan AQSH fuqarosi Jin (Yevgeniy) Spektorni josuslik ishi bo‘yicha hibsga oldi. Bu haqda 17 avgust, payshanba kuni Rossiya davlat axborot agentliklari sudga tayanib xabar berdi. Sud veb-saytida ish kartochkasi ham paydo bo‘ldi, ammo ayblov tafsilotlari ko‘rsatilmagan.
«Interfaks» xabariga ko‘ra, ish materiallari maxfiy bo‘lganligi sababli majlis yopiq eshiklar ortida o‘tgan. Josuslik bo‘yicha moddaga ko‘ra, hibsga olingan shaxs 10 yildan 20 yilgacha ozodlikdan mahrum etilishi mumkin.
Spektor Leningradda tug‘ilib o‘sgan, ammo keyinroq AQSHga ko‘chib o‘tgan va u yerda fuqarolikka ega bo‘lgan. U saraton kasalligiga qarshi dorilar ishlab chiqarishga ixtisoslashgan «Medpolimerprom» kompaniyalar guruhi direktorlar kengashi raisi hisoblangan, deb yozadi TASS.
AQSH ma’muriyati Amerika fuqarosining hibsga olinishiga hozircha izoh bermadi.
Dvorkovichning sobiq yordamchisiga pora berish bo‘yicha ish
TASS xabariga ko‘ra, Spektor avvalroq Rossiya bosh vazirining sobiq o‘rinbosari Arkadiy Dvorkovichning pora olgani uchun 12 yilga ozodlikdan mahrum etilgan yordamchisi Anastasiya Alekseyeva ishi bo‘yicha sudlangan.
2021 yil iyun oyida Moskvaning Ostankino sudi uni o‘ta yirik miqdorda pora berishga vositachilik qilganlikda aybdor deb topib, 4,5 yilga qattiq tartibli koloniyaga hukm qildi. Shu bilan birga, hukm apellyatsiya tartibida bekor qilindi va 2022 yil sentyabr oyida qayta ko‘rib chiqishda Spektor 3,5 yil qamoq jazosini oldi.
Alekseyeva 2023 yil aprel oyida 12 yilga ozodlikdan mahrum qilish jazosi va 75 million rubl miqdorida jarimaga tortildi. Tergov ma’lumotlariga ko‘ra, u bir qator vazn yo‘qotadigan dori vositalarini Rossiyada taqiqlangan dorilar ro‘yxatiga kiritmagani uchun chet el kurortlariga sayohat shaklida pora olgan.
Spectorga qarshi josuslik ayblovi ushbu ish bilan bog‘liqmi yoki yo‘qmi, bu hozircha noma’lum.
14:28, 29-04-2025
