Foto: Telegram
Rossiyaning Qorachoy-Cherkesiya Respublikasi rahbari Rashid Temrezov Ramzan Qodirovning 15 yoshli o‘g‘li Adamga respublika oliy davlat mukofoti topshirilganini ma’lum qildi.
“Adam Qodirov millatlararo va mintaqalararo birlikni rivojlantirish, an’anaviy islom qadriyatlarini mustahkamlashga qo‘shgan shaxsiy hissasi uchun 'Qorachoy-Cherkesiya Respublikasi oldidagi xizmatlari uchun' ordeni bilan taqdirlandi”, — deb yozgan Temrezov o‘zining Telegram-kanalida.
Temrezov Checheniston rahbarining o‘g‘lini “haqiqiy vatanparvar” deb atadi.
24 oktyabr kuni Tatariston rahbari Rustam Minnixonov Checheniston rahbari Ramzan Qodirovning o‘g‘li Adamni “millatlararo hamda konfessiyalararo tinchlik va totuvlikni mustahkamlashga qo‘shgan ulkan hissasi uchun” “Do‘stlik” ordeni bilan taqdirlagani ma’lum bo‘lgandi.
Sentyabr o‘rtalarida Adam Qodirov Qur’onni yoqib, dindorlarning tuyg‘ularini haqoratlashda ayblanayotgan volgogradlik Nikita Juravelni Checheniston tergov izolatorida kaltaklagani aks etgan video e’lon qilingandi. Ramzan Qodirov o‘g‘lining qilmishidan faxrlanishini aytgan.
“Zamin” yangiliklarini “Telegram”da kuzatib boring
