Mahalliy favqulodda yordam ko‘rsatish xizmatlari xabar berishicha, o‘n minglab kishilar elektr ta’minotisiz qolgan, ko‘plab binolar vayron bo‘lgan.
Shtat markazi Neshvill chekkasida uch kishi o‘limi qayd etilgan.
Yana uch kishi – katta yoshli ikki kishi va bir bola – Neshvilldan taxminan 80 km shimoli-g‘arbdagi Klarksvill shahrida vafot etgan.
Ijtimoiy tarmoqlarda e’lon qilingan videoda vayronaga aylangan binolar, ag‘darilgan avtomobillar va ildizi bilan qo‘porilgan daraxtlarni ko‘rish mumkin.
Kadrlarda yirik tornado ustunlari yer yuzasi bo‘ylab harakatlanib kelayotgani va osmonda yorqin chaqmoq chaqnashlari aks etgan.
Klarksvill tarkibidagi Montgomeri okrugi sherifi ofisi shaharda bir necha uy shikastlanganini tasdiqlagan.
Shanba kuni kechqurun Klarksvill meri favqulodda holat rejimi e’lon qilgan.
«Bu qayg‘uli xabar, biz yaqinlarini yo‘qotganlarga chin dildan hamdarmiz», – degan mer Jo Pits va shahar hukumati ularni qo‘llab-quvvatlashga tayyor ekanini ma’lum qilgan.
Montgomeri okrugida 23 kishi shifoxonaga yotqizilgan.
poweroutage.us sayti ma’lumotiga ko‘ra, mahalliy vaqt bilan yakshanbaga o‘tar kechasi soat 3:00 holatiga Tennessi shtatida qariyb 45 ming kishi elektr ta’minotidan uzilgan.
Qo‘shni Alabama shtatida ham minglab kishilar chiroqsiz qolmoqda.
Shanba kuni Milliy meteorologiya xizmati Tennessida tornado xavfi haqida bir necha bor ogohlantirish bergandi.
“Zamin” yangiliklarini “Telegram”da kuzatib boring
