00:15 / 06.01.2024

Ukraina Qurolli kuchlari: Ukraina harbiylarini tayyorlashga 34 ta davlat jalb qilingan

^{Foto: Google Images}

30 dan ortiq davlat u yoki bu tarzda Ukraina harbiylarini xorijda tayyorlash bo‘yicha tadbirlarni tashkil etishda ishtirok etmoqda. Bu haqda Ukraina Qurolli kuchlari Bosh shtabi doktrinalar va tayyorgarlik bosh boshqarmasi boshlig‘i, general mayor Aleksey Taran ma’lum qildi.

“Hozirda 34 ta davlatdan iborat hamkorlar koalitsiyasi Ukraina Qurolli kuchlari xodimlarini xorijda o‘qitish tadbirlarini tashkil etishda ishtirok etmoqda”, — dedi Taran Ukrainaning Army-inform agentligiga bergan intervyusida.

Uning so‘zlariga ko‘ra, bu davlatlar orasida AQSH, Buyuk Britaniya, Yevropa Ittifoqining aksariyat davlatlari, Kanada, Norvegiya, Avstraliya, shuningdek, Gruziya va Moldova bor.

Taran qo‘shimcha qilishicha, Buyuk Britaniya asosiy qo‘shma qurollarni tayyorlash, shuningdek, kichik qo‘mondonlarni tayyorlashni tashkil etishda so‘zsiz yetakchiga aylandi. Unga ko‘ra, 2022 yil fevralidan buyon Britaniyada 30 mingdan ortiq, 2014 yildan buyon esa 50 mingdan ortiq harbiy xizmatchi tayyorlandi.

2023 yilning noyabrida Buyuk Britaniya mudofaa vaziri o‘rinbosari Jeyms Xippi mamlakat 2024 yilda ukrainalik harbiylarni tayyorlashni davom ettirishi va bu borada yetakchilikni saqlab qolish niyatida ekanini aytgan edi. Biroq u britaniyalik instruktorlar 2024 yilda Ukraina Qurolli kuchlarining qancha jangchisini tayyorlashni rejalashtirayotganiga aniqlik kiritmagan.