11:12 / 10.01.2024

Pragada Rossiya hukumati rasmiylari talabiga binoan rossiyalik shaxs qo‘lga olindi

^{Foto: Ondrej Deml/dpa/CTK/picture alliance}

Praga politsiyasi Rossiya fuqarosi Yevgeniy Gerasimenkoni Vatslav Havel nomidagi aeroportda qo‘lga oldi, Rossiya hukumati uni hibsga olish uchun xalqaro order bergan, deb xabar tarqatdi Denik N nashri 9 yanvar, seshanba kuni politsiyaga tayanib.

Nashrning yozishicha, qo‘lga olish xalqaro hibsga olish orderi asosida amalga oshirilgan. Rossiya rasmiylari hozirda Gerasimenkoning moliyaviy firibgarliklari sababli vataniga ekstraditsiya qilinishini kutmoqda. Gerasimenkoni Rossiya Federatsiyasiga ekstraditsiya qilish imkoniyati haqidagi qaror Praga shahar sudi tomonidan ko‘rib chiqiladi. Hozirda rossiyalik hibsga olingan.

Rossiya Gerasimenkoni 2023 yilda hibsga olishga order bergan. Hibsga olingan shaxs bilan muloqotda bo‘lgan Denik N manbalarining aytishicha, unga nisbatan Rossiyada qo‘zg‘atilgan ish Gerasimenkoni Rossiyaga qaytarish maqsadida siyosiy xususiyatga ega.

Rossiyalik 7 yanvar kuni tushdan keyin Rigadan Praga orqali Parijga uchayotgan vaqtida qo‘lga olingan. U urushga qarshi pozitsiyasi va namoyishlarda qatnashgani uchun Rossiyada ta’qib qilinayotganini aytib, Fransiyadan siyosiy boshpana so‘ramoqchi edi, deb yozadi Denik N.

Rossiya Federatsiyasi Bosh prokuraturasi ma’lumotlariga ko‘ra, 2023 yil yanvar-noyabr oylarida xorijiy davlatlarning vakolatli organlari Rossiyadan fuqarolarni jinoiy javobgarlikka tortish yoki jazoni ijro etish uchun ekstraditsiya qilish bo‘yicha 101 ta so‘rovni qondirishdan bosh tortgan. Shu bilan birga, ushbu davrda 126 kishi xorijdan Rossiya tomoniga ekstraditsiya qilingan.