Sud «Krokus» terakti ishiga aloqador to‘qqizinchi shaxsni hibsga oldi

^{Foto: RIA Novosti}
Moskvaning Basmanniy sudi Nazrimod Lutfulloyini «Krokus Siti Xoll»dagi teraktga aloqadorlikda ayblab, 22 mayga qadar hibsga oldi, deb yozadi «Interfaks» 29 mart, juma kuni sud matbuot xizmatiga tayanib.

Lutfulloyi ham boshqa gumonlanuvchilar singari uyushgan guruh tarkibida odamlar o‘limiga sabab bo‘lgan terakt sodir etishda ayblanmoqda (Rossiya Federatsiyasi Jinoyat kodeksi 205-moddasi 3-qismi «b» bandi). 28 mart kuni Rossiya Tergov qo‘mitasi rahbari Aleksandr Bastrikin ish bo‘yicha yana bir gumonlanuvchi qo‘lga olingani haqida ma’lum qildi. Uning so‘zlariga ko‘ra, u «terrorizmni moliyalashtirish sxemasida» ishtirok etgan bo‘lishi mumkin.

Shot Telegram-kanaliga ko‘ra, qo‘lga olingan erkak 24 yoshda, u Tojikistondan kelgan, biroq Moskvaning Golyanovo tumanida vaqtinchalik ro‘yxatdan o‘tgan. «Ishlamaydi, uylanmagan, farzandlari yo‘q, ilgari sudlangan», - deyiladi postda. O‘z navbatida, «Izvestiya» nashri Lutfulloyi 23 mart kuni «Krokus»dagi teraktning ertasiga konsert o‘tkaziladigan joy yaqinida politsiya xodimlari tomonidan hujjatlarni tekshirayotganda qo‘lga olinganini da’vo qilmoqda.

«Politsiyaning shaxsni tasdiqlovchi hujjatlarni taqdim etish talabiga javoban u behayo so‘zlarni ishlata boshladi va o‘zini beadab tuta boshladi», deb yozadi gazeta. 25 mart kuni Moskvaning Preobrajenskiy sudi unga nisbatan mayda bezorilik va hokimiyat vakilining qonuniy talabiga bo‘ysunmaslik moddasi bo‘yicha ma’muriy jazo tayinladi.

Kriptobirja ofisida tintuvlar o‘tkazildi. Telegram-kanallar buni terakt ishi bilan bog‘layapti

29 mart kuni tushdan keyin xavfsizlik kuchlari Moskva-sitidagi «Federatsiya» minorasidagi Brebit kriptobirjasi ofisiga tintuvlar bilan keldi, deb yozgan Shot va Baza Telegram-kanallari, shuningdek, TASS. Mash ABCeX birjasi ofisida tintuv o‘tkazilgani haqida ham xabar berdi.

Kanallar xavfsizlik kuchlarining harakatlarini «Krokus»dagi terakt bilan bog‘layapti, biroq Brebit buni rad etdi. «Afsuski, ba’zi axborot kanallari «Krokus»dagi dahshatli voqealar fonida bizning platformamiz bilan bog‘liq voqealarga hech qanday aloqasi bo‘lmagan salbiy xabarlarni tarqatayotganini ta’kidlamoqchimiz», deyiladi uning Telegram-kanalida e’lon qilingan postda. “Zamin” yangiliklarini “Telegram”da kuzatib boring