Bananlar orasiga yashirilgan 1 mln dollarlik kokain musodara qilindi

^{Foto: AFP}
Gretsiyada banan qutilari ichiga yashirilgan 1 million dollarlik qiymatdagi kokain to‘xtatib qolindi. Bu haqda Al Arabiya nashri xabar berdi.

Manbada aytilishicha, narkotik moddalardan iborat jo‘natma Gretsiya qirg‘oq qo‘riqlash xizmati tomonidan fosh qilingan. Maxsus reyd davomida shubha tug‘dirgan banan qutilari ochib ko‘rilganda ular ichida taqiqlangan moddalar borligi ma’lum bo‘lgan.

Kokain 5 avgust kuni Gretsiyaning Pirey bandargohiga kirib kelgan kema ichidan topilgan. AQSHning Afinadagi elchixonasi milliy xavfsizlik bo‘yicha tergov bo‘limi oldindan taqdim etgan ma’lumotlar asosida operatsiya o‘tkazib, narkotik tashuvchilar hibsga olingan.

Hibsga olingan kemadagi banan qutilari Ekvadordan keltirilgan. Qutilar ichiga kokain bilan to‘ldirilgan 30 ta paket joylashtirilgan. Narkotik moddaning umumiy og‘irligi 35 kilogramm bo‘lgan.

Xabarda aytilishicha, Janubiy Amerikada kokain ishlab chiqarish so‘nggi o‘n yil ichida nihoyatda o‘zgan. U yerdan jo‘natilgan narkotik moddalar esa asosan Bolqon mamlakatlari, xususan Gretsiya orqali Yevropaga yoyilmoqda.

Joriy yilning may oyida Gretsiya rasmiylari Lotin Amerikasidan Yevropaga konteyner jo‘natib, kokain savdosi bilan shug‘ullanuvchi xalqaro jinoiy guruh yo‘q qilinganini ma’lum qilgan edi. Ushbu bayonotdan bir necha kun o‘tib esa Pirey portiga kirib kelgan bir kemada tekshirilgan boshqa kemada muzlatilgan kalmar qutilari ichiga yashirilgan 109 kilogramm kokain qo‘lga olingan. “Zamin” yangiliklarini “Telegram”da kuzatib boring