AQSh Livanni Gʻazoga aylantirmaslikni talab qildi

^{Foto: Getty Images}
Isroilning asosiy ittifoqchisi boʻlmish Qoʻshma Shtatlar amalda Eron tomonidan qoʻllab-quvvatlanadigan «Hizbulloh»ning Livandagi pozitsiyalariga zarba berilishini qoʻllaydi, shu bilan birgalikda, tinch aholiga, ayniqsa, Bayrut va uning atrofidagi aholi zich yashaydigan hududlarda etkaziladigan zararni minimumga tushirishni hamda bu mamlakatdagi harbiy amaliyotni Gʻazodagi kabi urushga aylantirmaslikni talab qiladi.

Bu bayonot AQSh prezidenti Jo Baydenning Isroil bosh vaziri Binyamin Netanyahu bilan soʻnggi ikki oy ichidagi ilk bor oʻtkazilgan telefon muloqotidan keyin yangradi. Bayden va Netanyahu Isroilning Eron raketa hujumiga ehtimoliy javobini, shuningdek, Gʻazodagi gumanitar vaziyat va hamon Hamas qoʻlida qolayotgan garovdagilarni tezda ozod etish zarurligini muhokama qilishgan.

Bu vaqtda esa BMT Isroil jangarilar boʻylab zarbalarni davom ettirayotgani, mamlakat ichkarisida muhojirlik qilganlar soni 600 ming kishiga etgani fonida Livan «halokatli» gumanitar inqirozga yuz tutayotganidan ogohlantirgan.

«Livan mojaro va halokatli koʻlamdagi gumanitar inqiroz qarshisida qoldi», — degan BMTning Livan boʻyicha maxsus vakili Janin Hennis-Plasshart Isroil mojaroni keskinlashtirmaslik haqidagi chaqiriqlarga quloq tutishidan umid qilib.

Livandagi gumanitar yordam boʻyicha koordinator Imron Rizo ham mamlakat oʻzining yangi tarixidagi eng halokatli davrlardan birini boshdan kechirayotganini ta'kidlab, «hatto urushlarning ham oʻz qoidalari borligi»ni eslatgan.

Ammo Isroil bosh vaziri Binyamin Netanyahu Livanda urush «Gʻazoda boʻlgani kabi uzoq davom etishi mumkinligi»dan ogohlantirgan.

Isroil shuningdek, har kuni minglab qochqinlar mamlakatni tark etish uchun havo yoʻllaridan foydalanayotganiga qaramay, Bayrut xalqaro aeroporti va unga olib boruvchi yoʻllarga hujumlar boʻlishi mumkinligini istisno qilmagan.

«Biz fuqarolik ob'ektlariga zarbalar bermaymiz, ammo shu bilan birga, „Hizbulloh“ harakatlangani yoki uning Isroil boʻylab raketa uchirish niyatini payqasak, bunday holatda har qanday davlat qiladigan ishni qilamiz», — degan Isroilning BMTdagi doimiy vakili Denni Denon.

BMT tinchlikparvar kuchlari pozitsiyasi oʻqqa tutilishi

Payshanba kuni BMTning Livandagi tinchlikparvar kuchlari (YuNIFIL) oʻzining Livan janubidagi pozitsiyalari oʻqqa tutilishi oqibatida ikki nafar harbiy xizmatchisi engil tan jarohati olganini ma'lum qildi, bu hududda «Hizbulloh» va Isroil armiyasi oʻrtasida toʻqnashuvlar davom etmoqda.

YuNIFIL vakilining soʻzlariga koʻra, tinchlikparvar kuchlarning uchta pozitsiyasi oʻqqa tutilgan. Isroil tanki kuzatuv minorasini oʻqqa tutishi tufayli BMTning ikki askari jarohatlangan, boshqa ikki pozitsiya oʻqotar qurollardan oʻqqa tutilgan, bu holatlarda hech kim jarohatlanmagan.

Avvalroq «Hizbulloh» rahbariyati oʻz jangchilari qoʻl granatomyotlarini qoʻllagan holda Isroil qoʻshinining chegaradagi hujumlarini muvaffaqiyat bilan qaytarayotganini ma'lum qilgandi.

Isroil shimolidagi Kiryat-Shmona shahriga raketalar bilan zarba berilishi oqibatida ikki kishi halok boʻlgan, sohildagi Kesariya shahri ustida yana ikkita raketa havo hujumidan mudofaa tizimi orqali tutib qolingan.

Livan sogʻliqni saqlash vazirligi Isroil aviazarbalari oqibatida Bayrutning janubiy-sharqiy chekkasida kamida toʻrt kishi halok boʻlganini xabar qilgan, bu hudud shu vaqtga qadar zarbalardan xoli boʻlib qolayotgandi.

Payshanba kuni Livan bosh vaziri Najib Mikati X ijtimoiy tarmogʻidagi sahifasida qayd etishicha, BMT Xavfsizlik kengashida Yaqin Sharqdagi vaziyat muhokama qilinadigan majlis boshlanishidan oldin inqirozli holatdan chiqish yoʻlini topish va Livanda sulhga erishishga qaratilgan diplomatik faollik keskin oshgan.

«AQSh va Frantsiya oʻrtasida siyosiy echim izlashga qaytish uchun sulh bitimini ma'lum muddatga yangilash maqsadida qator aloqalar yoʻlga qoʻyilmoqda», — deya yozgan livanliklar bosh vaziri.

Isroil quruqlik kuchlari Livanga 30 sentyabr kuni, «Hizbulloh» tomonidan soʻnggi bir yil davomida yoʻllangan raketa va artilleriya zarbalariga javoban boshlangandi. Isroil hukumati bu amaliyot orqali oʻz uylarini tark etgan minglab isroilliklar qaytishi uchun mamlakat shimoli xavfsizligini ta'minlash maqsad qilinganini bildirgan. “Zamin” yangiliklarini “Telegram”da kuzatib boring