OAV: “Hizbulloh” Isroil armiyasi qarorgohiga aviahujum uyushtirdi

^{Foto: NurPhoto}
Livanning “Hizbulloh” harakati qurolli kuchlari Isroil armiyasining Safed shahrida joylashgan shtab-kvartirasiga raketa hujumi uyushtirdi.

Safed shahri Livan bilan chegaradan 20 km uzoqlikda joylashgan. Livanda joylashgan Al-Mayadeen telekanali ma'lumotlariga koʻra, zarba berilgan shtab-kvartira Isroil shimolida joylashgan Isroil armiyasi boʻlinmalariga qoʻmondonlik qilmoqda.

Mazkur xabarga Isroil tomonidan hech qanday munosabat bildirilmagan.

27 sentyabr kuni “Hizbulloh” bosh kotibi Hasan Nasrulloh Bayrutda Isroil armiyasi tomonidan uyushtirilgan havo hujumida halok boʻlgan edi. Sentyabr oyi oxirida harakat Hoshem Safieddin Hizbullohning yangi bosh kotibi etib saylanganini e'lon qilgan. 8 oktyabr kuni Isroil bosh vaziri Binyamin Netanyaxu mamlakat armiyasining operatsiyasi natijasida Hoshem Safieddin oʻldirilganini ma'lum qilgan.

Avvalroq The Jerusalem Post nashri “Hizbulloh” rahbari oʻrinbosari Naim Qosim guruh Isroil bilan sulh tuzishga tayyorligini ma'lum qilgani haqida xabar bergan edi.

“Qosimning soʻzlariga koʻra, oʻt ochishni toʻxtatish masalasi diplomatik yoʻl bilan hal boʻlgach, qoʻshimcha tafsilotlar muhokama qilinib, tegishli qarorlar qabul qilinishi mumkin”, deyiladi xabarda.

Qosim, shuningdek, Livan parlamenti spikeri Nabih Berrining tinch hayotni tiklashga qaratilgan sa'y-harakatlarini eslatgan va vaziyatni hal qilish boʻyicha tashabbuslarni qoʻllab-quvvatlagan. “Zamin” yangiliklarini “Telegram”da kuzatib boring