Pokistondagi temir yo‘l vokzalida portlash sodir bo‘ldi: 24 kishi halok bo‘ldi

^{Pokiston xavfsizlik xodimlari Kvettadagi temir yo‘l vokzalida portlash sodir bo‘lgan joyni ko‘zdan kechirmoqda. Foto: Sami Xon/ EPA}
9 noyabr kuni Pokistonning Balujiston viloyatidagi temir yo‘l vokzalida xudkush o‘zini portlatib yubordi. Portlash yuzdan ortiq insonlar poyezd kutib turgan Peshavor stansiyasida sodir bo‘lgan. «Balujiston ozodlik armiyasi» separatistik guruhi terakt uchun javobgarlikni o‘z zimmasiga oldi.

Rasmiylarga ko‘ra, natijada stansiyasida bo‘lib turgan 24 kishi, jumladan o‘ndan ortiq harbiylar halok bo‘lgan, 40 dan ortiq odamlar jarohatlangan.

Al-Jazeera nashriga ko‘ra, 9 noyabr kuni ertalab sodir bo‘lgan hujum uchun javobgarlikni «Balujiston ozodlik armiyasi» separatistik guruhi o‘z zimmasiga oldi. Guruh o‘z bayonotida xudkush terrorchi temir yo‘l vokzalida bo‘lgan askarlarni nishonga olganini aytgan.

Pokistonning eng yirik, shu bilan birga qashshoq viloyati Balujistonda ayirmachi qurolli guruhlar tez-tez halokatli portlashlar sodir qilib turadi. Xususan, BOA uzoq vaqtdan beri Islomoboddan mustaqillikka erishish uchun qurolli isyon ko‘tarib kelgan. Ular viloyatning gaz va mineralga boy resurslaridan nohaq foydalanib kelinayotgani haqida aytadi.

Balujiston viloyati hokimiyati rasmiysi Shahid Rind portlash xudkushlik hujumi bo‘lganga o‘xshashini, lekin guruhning da’vosini tasdiqlash uchun tergov davom etayotganini bildirdi.

Pokiston bosh vaziri Shahbaz Sharif portlashni qoralab, hujumni uyushtirganlar «buning uchun juda og‘ir to‘lovlarni to‘lashini» aytgan. Shuningdek, u xavfsizlik kuchlari «terror tahdidini» butunlay yo‘q qilishga tayyorligini bildirdi. “Zamin” yangiliklarini “Odnoklassniki”da kuzatib boring