Sukerberg Donald Tramp bilan uchrashib, uni to‘liq qo‘llab-quvvatlashini aytdi

^{Foto: Gazeta.ru}
AQSHning saylangan prezidenti Donald Trampning maslahatchisi Stiven Miller Meta korporatsiyasi asoschisi Mark Sukerberg Floridadagi Mar-a-Lago qarorgohida bo‘lajak davlat rahbari bilan uchrashganini ma’lum qildi.

Maslahatchining so‘zlariga ko‘ra, Mark Sukerberg Tramp olib borayotgan o‘zgarishlarning tarafdori ekanini aytgan va bu harakatlar ishtirokchisi bo‘lish istagini bildirgan.

"Markning o‘z manfaatlari borligi aniq: uning o‘z kompaniyasi va rejalari bor. Ammo u Tramp boshchiligida Amerikaning milliy yangilanishini qo‘llab-quvvatlamoqchi ekanini ochiq aytdi", dedi Miller Fox News telekanalidagi chiqishi chog‘ida.

Politico nashri Meta vakilining bayonotiga tayanib, Sukerberg qarorgohda Oq uyning bo‘lajak ma’muriyati a’zolari bilan ham uchrashganini xabar qildi. Uning so‘zlariga ko‘ra, biznesmen kechki ovqatga taklif qilgani uchun Trampga “minnatdorlik” bildirgan.

Donald Tramp avvalroq Mark Sukerbergni tanqid qilgan edi. Bo‘lajak prezident o‘zining “Amerikani qutqarish” kitobida biznesmenni 2020 yilgi saylovlarga aralashishga urinishda ayblab, uni qamash bilan tahdid qilgan.

Meta asoschisi iyul oyida respublikachiga uyushtirilgan suiqasddan so‘ng saylovlarda Trampga ovoz berishni rejalashtirayotganini aytgandi.

Avvalroq amerikalik yana bir milliarder, Tesla kompaniyasi asoschisi Ilon Mask Trampning bo‘lajak administratsiyasida ish boshlashi xabar qilingandi.

U tadbirkor Vivek Ramasvami bilan birga davlat samaradorligini oshirish bo‘yicha yangi departamentga rahbarlik qilishi aytilgan.

"Birgalikda bu ikki ajoyib amerikalik mening ma’muriyatim uchun davlat byurokratiyasini demontaj qilish, ortiqcha qoidalarni, kerakciz xarajatlarni kamaytirish va federal agentliklarni qayta tashkil etish yo‘lini ochib beradi", dedi Tramp. “Zamin” yangiliklarini “Twitter”da kuzatib boring