Erdoʻgʻon Suriyaning keyingi taqdiri haqida nimalar dedi?

^{Foto: Global Look Press}
Turkiya prezidenti Rajab Toyyib Erdoʻgʻon Suriyaning hududiy yaxlitligiga rioya etish asosiy shart ekanini ta'kidlab, mamlakatni tashlab ketgan prezident Bashar Asadni tanqid qildi. Bu haqda Anadolu xabar berdi.

Siyosatchi Suriyada yangi voqeliklar yuzaga kelganini aytib, Anqaraning hududiy da'vosi yoʻqligini ta'kidladi.

"Suriyada zulmat davri tugab, yorugʻlik boshlandi... Turkiya hech qaysi davlatning hududiga yoki suverenitetiga daxl qilmaydi. Chegaradan tashqari oʻtkazilayotgan amaliyotlarimizning yagona maqsadi vatanimiz va fuqarolarimizni terrorchilik hujumlaridan himoya qilishdan iboratdir. Suriya diniy va konfessional mansubligiga koʻra suriyaliklarga tegishli. Suriyaning hududiy yaxlitligi — asosiy shart. Aynan Suriya xalqi qaror qabul qiladi", dedi Erdoʻgʻon.

U suriyaliklar arab, turkman, kurd, sunniy, alaviy yoki nasroniy boʻlishidan qat'i nazar — tinch-totuv yashaydigan Suriya Turkiyaning eng katta istagi, orzusi va maqsadi ekanini ta'kidladi.

"Chegaralar mamlakatlarni jismonan bir-biridan ajratib turishi mumkin, ammo qaysi kuch qalblar oʻrtasidagi chegaralarni koʻchirishi mumkin? Asrlar davomida yonma-yon yashab kelgan va 910 kilometrlik chegarani baham koʻrgan qoʻshnilarimizdan yuz oʻgirishimizni kim kutishi mumkin?

Agar yuragimizning bir yarmi Antep, Xatay, Shonliurfa boʻlsa, ikkinchi yarmi Afrin, Halab, Hama, Homs, Damashqdir. Bular tarix va geografiya bizga eslatib turadigan haqiqatlardir. 13 yil oldin qoʻshni mamlakatda yongʻin boshlanganida, birinchi boʻlib ularga chegaramizni ochdik. 13 yil davomida biz bu odamlarga boshpana berdik. Bugungi kunda ularning soni 2,9 milliongacha kamaydi", dedi u.

Erdoʻgʻonning aytishicha, Suriya mojarosi boshlanganidan buyon Turkiya qoʻshnichilik huquqi va buyuk davlat talablariga qat'iy amal qilib kelmoqda.

"Biz tinchlik, ozodlik, muloqot, adolat va Suriyada tezroq tinch yoʻl bilan nizoni hal etish tarafdori edik. Agʻdarilgan rejimning dushmanlik munosabatiga qaramay, har qanday vaziyatda ham Suriya hududiy yaxlitligi va yagona davlat tuzilishini himoya qilib keldik. Hech qachon adolatsizlik, qonunsiz zulm va ta'qiblarga qarshi ovozimizni koʻtarishdan choʻchimagandik", dedi u.

Erdoʻgʻon oʻz nutqida Bashar Asadni Suriyani vayronalar ichida tashlab qochganlikda aybladi. U Asad rejimining oʻz xalqiga nisbatan koʻplab adolatsizlik va vahshiylik holatlariga e'tiborni qaratdi. Jumladan, Suriyada Asaddan soʻng bir million kishi halok boʻlgani, 12 million kishi esa koʻchishga majbur etilganini aytdi. “Zamin” yangiliklarini “Telegram”da kuzatib boring