Azamat Sarsenbayev / Reuters / Scanpix / LETA
Azerbaijan Airlines (AZAL) aviakompaniyasining Bokudan Grozniyga reysni amalga oshirgan Embraer 190 rusumli yo‘lovchi samolyoti 25 dekabr tongida Qozog‘iston g‘arbidagi Aqtau shahri yaqinida aviahalokatga uchradi. Qulagan samolyot bortida 64 yo‘lovchi va ekipajning besh nafar a’zosi bo‘lgan, deb xabar qilgan Qozog‘iston FVV.
Avvaliga «Kazinform» agentligi samolyotda 105 yo‘lovchi va ekipajning besh a’zosi uchganini xabar qilgandi, ammo keyinroq xabariga tuzatish kiritdi. Qozog‘iston transport vazirligi xabarida esa bortda jami 62 yo‘lovchi va ekipajning besh a’zosi bo‘lgani aytilgandi. AZAL telegram-kanalida 62 yo‘lovchi va ekipajning besh a’zosi ro‘yxati e’lon qilingan.
Qancha odam halok bo‘lgani hozircha noma’lum, lekin omon qolganlar bor. Mang‘istau oblasti sog‘liqni saqlash boshqarmasi «Interfaks»ga voqea joyidan kamida to‘rt kishining jasadi topilganini ma’lum qilgan. Ozarboyjon bosh prokuraturasi Aqtaudagi aviahalokatdan 32 kishi omon qolganini xabar qildi. Bu yakuniy raqamlar emasligi qayd etilgan.
Bungacha Qozog‘iston FVV 29 kishi halokatdan omon qolganini, RIA Novosti esa jabrlanganlardan to‘qqiz nafari og‘ir ahvolda ekanini xabar qilgandi. FVVdagilar ikki bola shifoxonaga yotqizilgani haqida xabar bergan. FVV jabrlanganlar ro‘yxatini tayyorlamoqda.
Halokatdan keyin samolyot parchalangan, dum qismi ajralgan va ag‘darilgan. Fotosuratlar va hodisa videolaridan ko‘rish mumkinki, omon qolganlar aynan samolyotning dum qismida bo‘lgan.
Qozog‘iston sog‘liqni saqlash vazirligi Aqtauga jarrohlar va travmatologlar bilan sanitar aviatsiya bortini yuborgan.
Qozog‘iston FVV samolyot halokatida jabrlanganlar va halok bo‘lganlar haqida ma’lumot olish mumkin bo‘lgan ishonch telefonlarini e’lon qilgan: FVV boshqaruv markaziniki 8-96.55.7172-21 va Aqtau shahrida 8-90.31.7292-91.
Samolyotda to‘rt mamlakat fuqarolari parvoz qilgan. Qozog‘iston transport vazirligiga ko‘ra, bortda Ozarboyjonning 37, Rossiyaning 16, Qozog‘istonning olti fuqarosi, shuningdek uch nafar qirg‘izistonlik bo‘lgan. Shot telegram-kanali bortda bo‘lgan Rossiya fuqarolari ro‘yxatini e’lon qilgan, unda 15 rossiyalik bor, jumladan, 2011 va 2013 yillarda tug‘ilgan bolalar.
Samolyot halokatga uchrashi videoga olingan. Kadrlarda samolyot balandlikka ko‘tarilishga uringani, ammo boshqaruv tizimlari ishdan chiqishi tufayli pastlagani, qo‘nish yo‘lagiga kirishdan oldin 45 daraja burchak ostida yerga urilgani va shundan keyin portlash ro‘y berganini ko‘rish mumkin.
Shuningdek, ijtimoiy tarmoqlarda halokatdan keyin olingan videolar paydo bo‘lgan. Ularda omon qolganlarni va usti yopib qo‘yilgan jasadlarni ko‘rish mumkin.
Dastlabki ma’lumotlarga ko‘ra, samolyot Kaspiy dengizi ustida ekanida halokat signalini yo‘llagan, deb xabar beradi Ozarboyjonning APA agentligi. Shundan keyin layner majburiy qo‘nish uchun Qozog‘iston tomon yo‘l olgan.
Sputnik Azerbaijan aviakompaniyadagi manbaga asoslanib, samolyot qushlar galasi bilan to‘qnashib ketganini halokat sababi sifatida keltirgan. Rosaviatsiyadan ham shunday ma’lumot berishgan. Orda.kz esa Qozog‘istonning Mang‘istau oblasti sog‘liqni saqlash boshqarmasiga asoslanib, samolyot bortida ballon portlaganini xabar qilgan. Guvohlar nashr bilan suhbatda havo kemasi dvigateliga qush tiqilib qolgani, shundan keyin bortda kislorod balloni portlaganini aytib berishgan. «Kislorod balloni portlab ketdi, odamlar hushini yo‘qota boshladi», — deyishgan guvohlar.
Samolyot Aqtau aeroportining uchish-qo‘nish yo‘lagi yaqinidagi dalaga qulagan. Flightradar servisi ma’lumotlariga ko‘ra, halokatdan oldin samolyot aeroport ustida aylangan. AZAL'dagilar layner «Aqtau shahridan uch kilometr masofada avariyaviy qo‘nishni amalga oshirgani»ni aytishgan.
Samolyot tuman tufayli Grozniyga qo‘nish uchun ruxsat ololmagan. Layner avvaliga Mahachqal’aga, keyin esa Aqtauga yo‘naltirilgan, deb xabar bergan RIA Novostiga Grozniy aeroporti matbuot xizmati.
Qozog‘iston hukumati aviahalokat sabablarini o‘rganish bo‘yicha hukumat komissiyasi tuzgan. Havo kemasidan foydalanish paytida xavfsizlik qoidalari buzilishi moddasi bo‘yicha jinoiy ish qo‘zg‘atilgan.
Checheniston rahbari Ramzon Qodirov samolyot halokati yuzasidan hamdardlik bildirgan. «Azerbaijan Airlines laynerining Bokudan Grozniyga parvoz qilgan va Aqtauda halokatga uchragan reysi yo‘lovchilarining yaqinlariga hamdardlik bildiraman», — deya yozgan u telegram-kanalida. Qodirov jabrlanganlar tezda sog‘ayib ketishini tilagan.
Ozarboyjon prezidenti Ilhom Aliyev samolyot halokati munosabati bilan Rossiyadagi MDH sammitidagi ishtirokini muddatidan oldin yakunlab, Bokuga qaytishga qaror qilgan.
RF prezidenti matbuot kotibi Dmitriy Peskov Moskva Aqtaudagi aviahalokatda yaqinlarini yo‘qotganlarga chuqur hamdard ekanini bildirib, jabrlanganlarga sog‘lik tilagan. RF prezidenti Vladimir Putin Ozarboyjon prezidenti Ilhom Aliyev bilan telefon orqali bog‘lanib, hamdardligini bildirgan.
Halokatga uchragan Embraer E190AR bundan 11 yil muqaddam foydalanishga topshirilgan. Ochiq manbalardagi ma’lumotlarga ko‘ra, bu vaqt davomida bort AZAL va unga aloqador Buta Airways kompaniyalariga tegishli bo‘lgan.
Ozarboyjon, Azerbaijan Airlines layneri, Qozog‘iston, Aqtau, Aviahalokat “Zamin” yangiliklarini “Instagram”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Tadqiqot: atigi ming qadam yurish depressiya xavfini kamaytirishi mumkin
Vengriya bosh vaziri: “Ukrainadagi urush 2 xil yo‘l bilan tugaydi”
Panama prezidenti Trampning tahdidlariga qanday javob qaytardi?
Rim papasi Rossiya va Ukrainani qurollarini tashlashga chaqirdi
Alisher Usmonov urush boshlanganidan buyon qanday qilib 13,4 mlrd dollarga boyidi?
Rossiya razvedkachilari askarlarni qanday asirga olishdi?
O‘zbekistonda birinchi marta suyak infarkti jarrohlik amaliyoti muvaffaqiyatli o‘tkazildi
Putin MDH yetakchilari bilan uchrashuvda qanday fikrlar bildirdi?
