Eron yangi kamikadze-dron yaratdi

^{Foto: armyrecognition.com}
Eron uchish masofasi 20 kilometrgacha boʻlgan yangi kamikadze Rezvan dronini yaratdi. Tehron, shuningdek, katta miqdordagi Ababil-4, Ababil-5 va Arash hujumkor dronlarini sotib olishni rejalashtirmoqda, deb xabar berdi Breaking Defense'ga tayanib Kun.uz nashri.

Qayd etilishicha, Rezvan dronining parvoz davomiyligi 20 daqiqa boʻlib, uni boshqarish imkonini beruvchi old kameraga ega. Kamikadze-dron koʻchma qurilmadan uchirilishi mumkin, unda ochiladigan toʻrtta qanot mavjud.

«Ushbu dron Islom inqilobi qoʻriqchilari kopusi (IIQK) qoʻshinlarining tezkor javob berish boʻlinmalarini kuchaytirib, ularga terrorchilik guruhlariga, ayniqsa ogʻir togʻli sharoitlarda qarshi turish uchun yangi imkoniyatlar beradi», deb yozdi Eron matbuoti.

Rezvan droni «Buyuk paygʻambar 19» keng koʻlamli mashqlarida namoyish etildi. Dron ham piyodalarni, ham muqim nishonlarni, jumladan, muhim infratuzilmani ham urishga qodir.

Ta'kidlanishicha, Tehron yaqin kunlarda harbiylar uchun mingta strategik dronlarni sotib olishni rejalashtirmoqda. Eron armiyasiga etkaziladigan dronlar roʻyxatiga Ababil-4, Ababil-5 va Arash kiradi. Bu dronlar razvedka, patrullik va jangovar operatsiyalar boʻyicha koʻp maqsadli vazifalarni bajarishga qodir.

AQSh Tinchlik instituti (USIP) Ababil-5 droni 480 kilometrga yaqin masofani bosib oʻtishini ma'lum qildi. Ushbu dron tankka qarshi 4 ta raketa yoki 6 ta yuqori aniqlikdagi bombani olib yurishga qodir.

Nashrning qoʻshimcha qilishicha, Eron Rossiyaning Ukrainaga keng koʻlamli bostirib kirishi boshlanganidan keyin dronlarga katta qiziqish bildira boshlagan. “Zamin” yangiliklarini “Telegram”da kuzatib boring