AQSh Oliy sudi milliy xavfsizlikka tahdid tufayli TikTok taqiqini ma'qulladi

AQSh Oliy sudi TikTok’ni sotishni yoki ilovani mamlakatda butunlay taqiqlashni talab qiluvchi qonunni ma'qulladi.

Bunday qaror milliy xavfsizlik va TikTok’ning Xitoy hukumati bilan taxminiy aloqalari bilan bogʻliq xavotirlar tufayli qabul qilindi, deb xabar berdi Reuters.

Sud qaroriga koʻra, qonun soʻz erkinligi kafolatini buzmaydi. Kongress amerikalik foydalanuvchi ma'lumotlarining Xitoy rasmiylariga oʻtkazilishining oldini olish choralarini koʻrish zarur deb hisobladi. 19 yanvardan boshlab TikTok ilovasini onlayn doʻkonlardan yuklab olishning imkoni boʻlmaydi.

Taqiqni qoʻllab-quvvatlagan qonunchilar TikTok’dan Xitoy Kommunistik partiyasi manipulyatsiya qilish, nazorat qilish va tashviqot tarqatish uchun foydalanishi mumkinligini ta'kidlamoqda. Oliy sud bu dalillarga rozi boʻldi.

170 million amerikalik foydalanadigan TikTok rahbariyati mazkur qonun soʻz erkinligiga tahdid solayotganini aytdi. Kompaniya, agar sotuv belgilangan muddatda yakunlanmasa, Qoʻshma Shtatlardagi faoliyatini toʻxtatishga majbur boʻlishidan ogohlantirdi.

Qaror demokratlar va respublikachilar oʻrtasida boʻlinishlarga olib keldi, garchi ikkala tomon ham fuqarolar ma'lumotlarini himoya qilishni qoʻllab-quvvatlasa ham. Oq uy TikTok amerikalik xaridorga sotilgan taqdirdagina faoliyatini davom ettirishi mumkinligini aytdi.

Donald Tramp “TikTok’ni saqlab qolishga” va'da berdi. Uning soʻzlariga koʻra, kelishuvlar boʻyicha oʻzining tajribasi TikTok va AQSh rasmiylari oʻrtasida kelishuvga erishishga yordam beradi.

20 yanvar kuni inauguratsiyadan soʻng AQShning saylangan prezidenti Donald Tramp Adliya vazirligiga bir kun avval kuchga kirgan qonunni qoʻllamaslik haqida koʻrsatma berishi mumkin boʻladi. “Zamin” yangiliklarini “Telegram”da kuzatib boring