Bob Dilan qo‘shig‘ining qoralamasi 508 ming dollarga sotildi

Amerikalik qo‘shiqchi Bob Dilan 1965 yilda yozgan «Mr. Tambourine Man» qo‘shig‘ining qoralamasi kimoshdi savdosida 508 ming AQSH dollariga sotildi. Bu haqda Julien's Auctions kimoshdi savdolar uyi ma’lum qildi.

Savdo 18 yanvar kuni Tennessi shtatining Nashvil shahrida bo‘lib o‘tdi.

Qoralamalar musiqa yo‘nalishida qalam tebratuvchi jurnalist El Aronovitsning shaxsiy jamg‘armasida saqlab kelingan. Ma’lumotlarga ko‘ra, u bu qoralamalarni Dilan qog‘ozlarni tashlab yuborgan chiqindi savatidan olgan.

Auksionda, shuningdek, qo‘shiqchining gitaralaridan biri, maktublari, fotosuratlari hamda uning o‘zi 1968 yilda chizgan rasm sotilgan.

^{Bob Dilan}
Robert (Bob) Dilan (1941 yilning 24 mayida tug‘ilgan) — amerikalik qo‘shiqchi, rassom, yozuvchi va kinoaktyor. So‘nggi 60 yilda pop-musiqa sohasining eng nufuzli insonlaridan biri. «Buyuk Amerika qo‘shiqchilik an’analarida yangi she’riy ifodalarni yaratgani uchun» 2016 yilda adabiyot yo‘nalishida Nobel mukofotini olgan. “Zamin” yangiliklarini “Telegram”da kuzatib boring