Ukraina asirdagi shimoliy koreyalikni yana soʻroq qildi (video)

^{Foto: Videodan kadr}
Ukraina prezidenti Vladimir Zelenskiy Kursk viloyatida asirga olingan shimoliy koreyalik harbiylarning soʻroq qilinishi aks etgan navbatdagi videoni e'lon qildi.

Videoda KXDR harbiysi tarjimon orqali Ukraina maxsus xizmatlari vakillarining savollariga javob bermoqda. Video qachon va qayerda suratga olingani noma'lum. U yuzdan ortiq vatandoshi bilan Rossiyaga kemada kelgani, keyin ularni poyezdda olib ketishganini ta'kidlagan.

"Shimoliy Koreyadan kelgan bir necha askar Rossiya ogʻir qurollaridan foydalanishni oʻrgandi, lekin oʻzim bunday tayyorgarlikdan oʻtmaganman", dedi u.

Yigitning aytishicha, u razvedka batalonida xizmat qilgan. Ularni Rossiyaga olib kelgan kema harbiy emas, yuk tashuvchi boʻlganini aytdi. KXDR harbiysi maktabni tugatgandan soʻng, 17 yoshida armiyaga xizmatga borgani va Shimoliy Koreyadan tashqaridagi dunyo haqida juda kam ma'lumotga ega boʻlganini ta'kidlagan. U shimoliy koreyalik harbiylar orasida urushda jarohatlanganlar soni koʻpligini qayd etgan.

"Razvedka ma'lumotlariga koʻra, harbiylarning Rossiya hududiga koʻchirilishi, ularning oʻqitilishi va axborot izolyatsiyasiga duchor qilingani asirlarning soʻzlari bilan tasdiqlanadi", dedi Zelenskiy.

UXXning aniqlik kiritishicha, 2005 yilda tugʻilgan harbiy asirlardan biri 2021 yildan beri KXDR armiyasida oʻqchi sifatida xizmat qilgan. 1999 yilda tugʻilgan ikkinchi askar esa 2016 yildan beri mamlakat armiyasida mergan-razvedkachi boʻlgan.

Ukraina prezidenti avval ham asirlar soʻroq qilingani videosini e'lon qilgandi. Soʻroq paytida KXDR askarlari qayerdaligini bilmasligi, ularga bu faqat oʻquv mashgʻuloti deb aytilganini ta'kidlagan.

KXDR jangchilaridan Shimoliy Koreyaga qaytishni xohlaysizmi, deb soʻralganda, xavfsizlik xizmati kutilmagan javob olgan. Mahbuslardan biri vataniga qaytishni afzal koʻrishi, ikkinchisi esa Ukrainada qolishni xohlashini aytgan.

Zelenskiyning soʻzlariga koʻra, Ukraina ularni Rossiyadagi ukrain asirlariga ayirboshlash doirasida vataniga qaytarishga tayyor. “Zamin” yangiliklarini “Telegram”da kuzatib boring