Truett Heyns 24 soatda 10 001 marta turnikda tortilib, jahon rekordi o‘rnatdi (video)

2025 yil 1 fevral kuni AQSH fuqarosi Truett Heyns Yuta shtati, Solt-Leyk-Siti shahrida jahon tarixidagi eng hayratlanarli sport yutuqlaridan birini qayd etdi. U Ginnesning rekordlar kitobiga 24 soat ichida 10 001 marta turnikda tortilish orqali yangi rekord o‘rnatgani bilan kirdi.

Ginnesning rasmiy saytida qayd etilishicha, Heyns ushbu natijaga katta tayyorgarlik va iroda tufayli erishgan. Bu uning birinchi urinishi emas – u 2021 yilda ham 8 100 marta tortilib, shunga o‘xshash rekordni o‘rnatgan edi. Ammo bu natija uzoq saqlanmadi: avstraliyalik Garri Loyd qisqa fursat ichida 8 600 marta tortilib, Heynsning yutug‘ini ortda qoldirgan edi.

Biroq amerikalik sportchi orqaga chekinmadi va joriy yilda barchani lol qoldiradigan natijaga erishdi – 10 001 marta tortilish! Bu orqali u nafaqat o‘zining avvalgi yutug‘ini qayta tikladi, balki yangi marraga ham chiqdi.

Rekorddan so‘ng Heyns shunday dedi: "O‘zim haqimda shuni aytishim mumkinki, men hech qachon taslim bo‘lmayman. Balki men noyob qobiliyat yoki kuchga ega emasman va hayotim davomida ham menga hech qachon oson bo‘lmagan, biroq taqdir o‘z maqsadlarimdan voz kechmaslik imkoniyatini berdi."

Sportchi nafaqat jismoniy kuch-g‘ayrati, balki ma’naviy bardoshi bilan ham ko‘pchilikka o‘rnak bo‘lmoqda. Uning yutug‘i iroda, sabr va qat’iyat bilan nimalarga erishish mumkinligini yana bir bor isbotladi. “Zamin” yangiliklarini “Telegram”da kuzatib boring