Ukraina Patriot tizimi bilan yanada kuchayadimi? Isroildagi ZRK Kiyevga yo‘l olmoqda

Rossiyaning Ukrainaga qarshi hujumlari yanada shiddatlanayotgan bir paytda, Kiyevga Isroil orqali Patriot zenit-raketa kompleksini (ZRK) yetkazib berish rejasi kun tartibiga chiqdi. Bu haqda The New York Times nashri to‘rt nafar sobiq va amaldagi amerikalik rasmiylarga tayanib xabar berdi.

Ta’mirlanayotgan ZRK – Kiyevga yozga qadar yetib borishi kutilyapti

Ma’lum qilinishicha, gap Patriot tizimining eski, lekin ishonchli modifikatsiyasi haqida bormoqda. Ayni paytda ushbu ZRK Isroilda kapital ta’mirlanmoqda va yilning yozida Ukrainaga yetkazilishi rejalashtirilgan.

Ayni damda Ukraina Qurolli kuchlari tarkibida 8 ta Patriot ZRK mavjud, ammo faqat 6 tasi to‘liq ishlaydigan holatda. Qolgan ikkitasi ta’mirda.

Germaniya yoki Gretsiya orqali yana bir ZRK yetib borishi mumkin

Amerikalik rasmiylarning aytishicha, Germaniya yoki Gretsiya ham Ukrainaga Patriot tizimini berish uchun nomzod davlatlar sifatida ko‘rilmoqda. Agar shunday bo‘lsa, Ukrainadagi Patriot ZRK soni 10 taga yetkazilishi mumkin.

AQSH roziligisiz birorta Patriot yetkazilmaydi

Ta’kidlash joiz, Patriot kompleksi kabi yuqori texnologiyali harbiy tizimlarni yetkazib berish faqat AQSH hukumati roziligi bilan amalga oshiriladi. The New York Times manbasiga ko‘ra, Oq uy ma’muriyati sentyabrda, Donald Tramp saylovlarda g‘alaba qozonishidan avval Isroil bilan ushbu kelishuv bo‘yicha kelishib olgan.

Tramp prezidentlikka kelganidan keyin esa Ukrainaning yangi Patriot so‘rovlarini rad etish yo‘li tutilmoqda. Garchi prezident Zelenskiy ularni pul evaziga sotib olishga tayyorligini bildirgan bo‘lsa-da.

Zelenskiy ta’kidlagan edi: “Ukrainaning xavfsizligi uchun kamida 25 ta Patriot tizimi kerak.”

Pentagon: Kiyevga yordam davom etadi

AQSH Mudofaa vazirligi ma’lumotlariga ko‘ra, Ukrainaga oldin tasdiqlangan askariy yordam paketlari orqali qurol yetkazish ishlari davom etmoqda. Ular tarkibida Patriot tizimlari va ularga mos raketa-uskunalar ham mavjud.

Isroil omborlaridan Polshaga – keyin Ukrainaga

2025 yilning yanvar oyida AQSH harbiylari Isroildagi omborlardan taxminan 90 ta Patriot raketa snaryadini chiqarib, ularni Polsha orqali Ukrainaga yuborish uchun tayyorlab qo‘ygani aytildi.

Patriot tizimi haqida kerakli ma’lumotlar:

• Yaratilish xarajati: 1 milliard dollar;
  
• Xizmat ko‘rsatish uchun kerakli harbiylar soni: 90 nafar;
  
• Tarkib: 5–8 ta uchirish qurilmasi, radar, nazorat bloki va to‘rtta tutib oluvchi raketa;
  
• Birta raketa narxi: taxminan 4 million dollar.
  

Dunyo bo‘ylab 186 ta Patriot bor – 1/3 AQSHga tegishli

Xalqaro strategik tadqiqotlar instituti ma’lumotiga ko‘ra, dunyoda hozirgi kunda 186 ta Patriot tizimi faoliyat yuritmoqda. Ulardan uchdan biri AQSH ixtiyorida. Qolganlari Yevropa mamlakatlari, jumladan Ukrainadagi mudofaa tizimlarining bir qismi hisoblanadi.

Ushbu yangi tashabbus Kiyevning Rossiya hujumlariga qarshi kuchliroq himoyaga ega bo‘lishi uchun qo‘shimcha imkoniyat yaratishi mumkin. Bir vaqtning o‘zida bu Vashington – Tel-Aviv – Kiyev o‘qidagi strategik hamkorlikning yangi bosqichini boshlashi mumkin.

Siz nima deb o‘ylaysiz — Patriot tizimlarining soni ortsa, Ukraina xavfsizligi sezilarli darajada yaxshilanadimi?

Foto: Reuters “Zamin”ni Telegramʻda oʻqing!