Polsha prezidentligiga nomzod Gjegoj Braun Yevropa Ittifoqi bayrog‘ini yoqib yubordi (video)

Polsha prezidentligiga da’vogar bo‘lgan va shov-shuvli chiqishlari bilan nom qozongan deputat Gjegoj Braun yana bir mojaroni keltirib chiqardi. Bu safar u Katovitse shahrida Yevropa Ittifoqi bayrog‘ini yerga uloqtirib, uni oyog‘i bilan bosib o‘tib, so‘ngra ko‘pchilik ko‘z o‘ngida yoqib yubordi. Ushbu voqeaning videosi uning ijtimoiy tarmoqdagi shaxsiy sahifasida e’lon qilindi.

RMF 24 nashrining xabar berishicha, ushbu janjalli voqea Katovitse shahridagi sanoat vazirligi binosida sodir bo‘lgan. Ma’lum bo‘lishicha, Gjegoj Braun parlament deputati sifatida mamlakatning ko‘mir konlari sanoatidagi vaziyatni o‘rganish maqsadida u yerga tashrif buyurgan. Ammo tadbir davomida u Yevropa Ittifoqi bayrog‘ini olib, demonstrativ tarzda uni yerga tashlab, ustidan oyoqlari bilan bosib o‘tgan va yakunda yoqib yuborgan.

«Bu yer Bryussel emas, bu yer Polsha!» — deb yozdi u o‘zining ijtimoiy tarmoqdagi sahifasida.

Voqea sodir bo‘layotgan paytda noma’lum bir ayol prezidentlikka nomzodning bu harakatiga to‘sqinlik qilishga uringan, biroq Braun uni jiddiy qarshilik bilan qaytara olgan.

«O‘zingizga rahmingiz kelsin! Agar uyalmasangiz, Xudodan qo‘rqing! Bu yer Polsha, Bryussel emas! Biz mamlakatimizda dushman tashkilotlar bayroqlarini ko‘rsatishga yo‘l qo‘ymaymiz!» – deb qo‘shimcha qildi siyosatchi.

Bu Braunning birinchisi emas. Ilgari ham u bir necha bor Ukraina bayrog‘i bilan bog‘liq mojarolarning markazida bo‘lgan edi. Xususan, uning tarafdorlari 2022 yildan beri Byala Podlyaska shahar hokimiyati binosida osig‘liq turgan Ukraina bayrog‘ini majburiy tarzda olib tashlashgan. Keyinchalik Braun bu harakatni qo‘llab-quvvatlagan va barcha javobgarlikni o‘z zimmasiga olgan holda, Ukraina bayrog‘ini ushbu davlatning yaqindagi konsulligiga yetkazib berishga va’da qilgan.

Ma’lumot uchun, yaqinda Yevroparlament Gjegoj Braunni deputatlik daxlsizligidan mahrum qilgan. Varshava okrug prokuraturasi esa unga qarshi yettita turli jinoyat bo‘yicha ayblov e’lon qilishga tayyorlanmoqda.

Ushbu voqea Polsha va Yevropa ommaviy axborot vositalarida katta rezonansga sabab bo‘lib, ko‘plab siyosiy tahlilchilar va kuzatuvchilar tomonidan keskin tanqid ostiga olinmoqda. Hozirda mamlakat jamoatchiligi ushbu holatga nisbatan turli munosabatlarni bildirmoqda.

Siyosiy tahlilchilarning fikricha, bu harakat Braunning saylov kampaniyasidagi keskin, milliy manfaatlarga urg‘u berishga qaratilgan strategiyasining bir qismidir. Bunday keskin harakatlar bir tomondan uning millatchi tarafdorlari orasida obro‘sini oshirishi mumkin bo‘lsa, boshqa tomondan xalqaro hamjamiyat va mamlakatning yevroparast qatlamlari tomonidan jiddiy tanqidlarga sabab bo‘lmoqda.

Hozircha Polsha rasmiylari va Yevropa Ittifoqi vakillari tomonidan mazkur voqeaga nisbatan aniq rasmiy munosabat bildirilganicha yo‘q. Biroq, yaqin kunlarda ushbu voqeaga nisbatan jiddiy huquqiy choralar ko‘rilishi ehtimoli yuqori baholanmoqda. “Zamin”ni Telegramʻda oʻqing!