Meksikada siyosiy zo‘ravonlik: merlikka nomzod saylovoldi mitingida otib o‘ldirildi

11 may kuni Meksikaning Verakrus shtatidagi Teksistepek munitsipalitetida yuzaga kelgan qonli hodisa mamlakatdagi siyosiy zo‘ravonlik muammosini yana bir bor kun tartibiga olib chiqdi. Saylovoldi kampaniyasi davomida, hokimiyat uchun kurashayotgan siyosatchi – merlikka nomzod Yeseniya Lara Guterrez noma’lum qurollilar tomonidan o‘qqa tutildi. Hujum oqibatida siyosatchi bilan birga yana uch kishi halok bo‘lgan.

Halok bo‘lgan nomzod Meksikaning hukmron partiyasi – «Milliy uyg‘onish harakati» safida bo‘lib, kelayotgan 1 iyun saylovlarida faol qatnashishi kutilgandi. Shu bilan birga, guvohlar va mahalliy manbalarga ko‘ra, hujum juda tez va shiddat bilan amalga oshirilgan – qurollangan shaxslar to‘satdan miting o‘tkazilayotgan maydonga hujum qilib, bir necha soniya ichida bir nechta insonni nishonga olishgan.

Hukumat rasmiylari hozircha hujum sababini oshkor qilmadi

Mamlakat prezidenti Klaudiya Sheynbaum 12 may kuni o‘tkazilgan matbuot anjumanida hujumning aniq sabablari hozircha aniqlanmaganini ta’kidladi. U hukumat va mahalliy hokimiyatlar o‘rtasida tergov ishlarini muvofiqlashtirish bo‘yicha ishlar olib borilayotganini ma’lum qildi.

Siyosiy zo‘ravonlik muammosi kuchaymoqda

Joriy yilda Meksikada siyosiy raqobat, ayniqsa munitsipal darajada, faqat siyosiy qarama-qarshilik bilan cheklanmayapti. Data Civica inson huquqlari tashkilotining ma’lumotlariga ko‘ra, 2024 yilning o‘zida 661 ta siyosiy sababli zo‘ravonlik hodisasi qayd etilgan bo‘lib, ularning ko‘pchiligi mahalliy darajadagi nomzod va amaldorlarni nishonga olgan.

Bu holat Meksikadagi saylov jarayonlarining xavfli tus olayotganidan dalolat beradi. Xalqaro kuzatuvchilar va inson huquqlari tashkilotlari bu holatni jiddiy xavf sifatida baholashmoqda va hukumatdan saylov jarayonining xavfsizligini ta’minlash uchun qat’iy choralar ko‘rishni talab qilishmoqda.

Zamin.uz tahririyati Meksika xalqiga tinchlik, siyosiy adolat va xavfsiz saylov jarayoni tilaydi. Bu kabi voqealar mamlakat demokratiyasiga va jamiyatdagi ishonch muhitiga jiddiy zarar yetkazmasligi kerak. “Zamin”ni Telegramʻda oʻqing!