Zelenskiy Turkiyadagi muzokaralarga tayyor: Rossiyaning javobi qanday bo‘ladi?

Ukraina prezidenti Volodimir Zelenskiy 15 may kuni Turkiyaning Istanbul shahrida o‘tkazilishi rejalashtirilgan muzokaralarga tayyor ekanligini yana bir bor ta’kidladi. Ammo Rossiya tomonidan aniq kim ishtirok etishi masalasi hanuzgacha noaniq bo‘lib qolmoqda.

Zelenskiy o‘zining so‘nggi chiqishida Rossiya tomonining muzokaralarga nisbatan munosabatini tanqid qilib, ularning aniq va qat’iy javob bermasligidan shikoyat qildi.

«Hozir butun dunyo Rossiya prezidenti Vladimir Putindan faqatgina to‘g‘ridan to‘g‘ri muzokaralarga rozilik bildiruvchi oddiy "ha" javobini kutayapti. Ammo o‘sha paytda ham Rossiya Ukrainaga qarshi zarbalarni davom ettirmoqda. Bunday harakatlarning hech qanday harbiy mantig‘i yo‘q, bu faqat urushni cho‘zishga qaratilgan harakatdir», – dedi Zelenskiy o‘z bayonotida.

Ukraina prezidenti Turkiyadagi uchrashuvda kim ishtirok etishini Rossiya hali ham aniq tasdiqlamaganidan xavotir bildirdi. Uning ta’kidlashicha, Kremlga yaqin bo‘lgan ommaviy axborot vositalari orqali tarqatilayotgan ma’lumotlar hozircha ishonchsiz va turli xil talqin qilinayotgan signallardan iboratdir.

«Hozir men Rossiya tomonidan kim qatnashishini aniqlashtirishini kutayapman. Bu juda muhim. Faqat shundan keyin biz keyingi harakatlarimizni belgilay olamiz. Rossiya tomonidan yetarlicha ishonchli va rasmiy tasdiqlangan ma’lumotga ega bo‘lmaguncha, har qanday xulosa chiqarishdan tiyilamiz», – dedi Zelenskiy.

Shuningdek, Zelenskiy Turkiyada bo‘lib o‘tadigan muzokaralarda AQSH prezidenti Donald Trampning ham qatnashishi ehtimolini eslatib o‘tdi. Avvalroq AQSHning yuqori darajali vakillari, shu jumladan maxsus vakil Kit Kellog hamda prezident Trampning o‘zi ham ushbu muzokaralarda ishtirok etishi mumkinligini bildirgandi.

«Biz muzokaralar uchun har qanday formatga ochiqmiz va undan qo‘rqmaymiz. Ertaga Turkiyada boshlanadigan uchrashuvlarda o‘zimizning pozitsiyamiz va fikrimizni aniq hamda qat’iy bayon qilamiz», – deya ta’kidladi Zelenskiy.

Turkiya tashqi ishlar vaziri Hoqon Fidan esa muzokaralarning formati hali-hanuz aniqlanmaganini ma’lum qildi. Bu uchrashuv Moskva va Kiyev o‘rtasidagi 2022 yil bahoridagi o‘q uzishni to‘xtatish bo‘yicha muzokaralardan keyingi ilk to‘g‘ridan to‘g‘ri muloqot bo‘ladi.

Xalqaro jamoatchilikning diqqati ertangi uchrashuvga qaratilgan bir vaqtda, Rossiya tomoni qanday javob qaytarishi hali noma’lum bo‘lib turibdi. Ukraina esa tinchlik yo‘lida har qanday imkoniyatdan foydalanishga tayyorligini qat’iy ravishda bildirdi. “Zamin”ni Telegramʻda oʻqing!